آلالام الواقع ..... روايه رائعه

اتساءل خالد بدهشه :
خالد : هيه صح .. بس في النهايه النتيجه وحده .. ما بنقدر نوصلها الا اذا دخلت الشات او الماسنجر ..

ابتسم عادل وقال :
عادل : لا ... ممكن نوصلها طبعا اذا فتحت النت ..

اتساءل خالد باستغرب :
خالد : كيف ...

جاوبه عادل بثقــة :
عادل : شوف يا خالد .. من حسن حظك ان برنامج الماسنجر اللي عندي بالكمبيوتر .. مربوط ببرنامج خاص كنت يايبنه خصيصا من أمريكا .. وها البرنامج يرسل ملف يشبه ملف ( ال****ز ) وبصوره تلقائيه لاي شخص يرتبط فيه عن طريق الماسنجر..و بدون ما يدري الطرف الثاني ... وبما ان البنت اشتبكت معاك .. فمن الطبيعي ان البرنامج ارسلها ملف يشبه ملف (ال****ز ) ..

اتساءل خالد بدهشه :
خالد : ملف ( ****ز ) .. شو هذا بعد ...

بانفعال خفيف قال عادل بهلجة سريعة ورسمية :
عادل : ملف ال****ز عباره عن ملف صغير يتكون عاده من 256 شفره تنرسل للقرص الصلب من المواقع التي تقوم بزياتها اثناء تجوالك في شبكة الانترنت... وهيه تعتبر اداه تقنيه رايعه لمتابعة أثرك اللي تتركه على الشبكه ، ووسيله مريحه عشان يتم تعقبك مستقبلا .. لكنها تعتبر ( خطره ) اذا ساء استغلالها لجمع المعلومات عن كمبيوترك ..

اتساءل خالد..
خالد : وكيف يدخل ها الملف للكمبيوتر ؟!

جاوبه عادل باسهاب :
عادل : اول ما تزور موقع على الشبكه وتدخل صفحه رئيسه او فرعيه من موقع .. يقوم الموقع باصدار نسختين من ملفات ( ال****ز ) الخاصه فيه .. نسخه يرسلها لجهازك والنسخه الثانيه يحتفظ فيها في ( السيرفر ) الخاص فيه ، ويستخدمون ها الملف في بعض المواقع مثل المنتديات او غرف الشات ..

حرك خالد ايده وهو يتساءل :
خالد : وشو بنستفيد منه ..

ابتسم عادل ابتسامه خفيفه وقال :
عادل : ملف التجسس اللي يشبه ملف ( ال****ز ) واللي يرسله برنامجي . من النوع المتقدم والمتطور وغير عن ملفات ال****ز العاديه... ومن مميزاته انه يتناسخ بمجرد دخوله كمبيوتر الطرف الثاني .. فيعمله أكثر من نسخة في الذاكره الرئيسه وحتى في الذاكره الاحتياطيه .. بحيث تقدر اتحوله لـ ( حصان طرواده ) او ( جاسوس نائم ) .. وببساطه يتحول لملف تجسس ..وحتى لو أعدت برمجة الكمبيوتر ( الفورمات ) بيظل موجود .. لانه ينسخ نفسه او ( يتكاثر ) في كل أجزاء واقسام الكمبيوتر وانته في العاده ما بتفرمت الا الجزء الرئيسي اللي فيه بيئة الوندوز ...

سكت خالد فتره وهو يفكر بدهشه وفي النهايه قال :
خالد : يعني قصدك تبانا انسوي اللي ايسمونه ( هكـــر ) ونتجسس على كمبيوترات الناس ..

ابتسم عادل وتابع :
عادل : يمكن ايكون نوع من الاختراق او التجسس.. لكنه مب ( هكر ) ..

اتساءل خالد باندهاش شديد :
خالد : بس انا اسمعهم ايقولون ان (الهكر ) هم الناس اللي يتجسسون على كمبيوترات الاخرين ويسحبون ملفاتهم ومرات ايلعوزونهم مثل قلب الشاشه او تحريك ( درايفارات ) الكمبيوتر ..

جاوبه عادل بحماس :
عادل : اسمعني يا خالد .. الكثير من الناس فاهم ( الهكر ) غلط .. المقصود بالهكر او الناس ( الهكيره ) .. هم المتخصصين في نظم المعلومات والبرمجيات او مجموعه من المبرمجين الاكفاء والمهره .. يعني ( الهاكرز ) هم اللي صنعوا أغلب برامج الحاسبات و الشبكات و البرمجيات ... يعني باختصار هم ناس طيبين و خيرين وفنانين ساعدوا في تطوير جهاز الكمبيوتر ..

سكت عادل لحظات وبعدها تابع :
عادل : وفيه مفهوم ثاني معروف بعد وهو ( الكراكرز ) واصل ها الكلمه من ( الكسر او التكسير ) ومعناها العام بالنسبه لموضوعنا هو التخريب والتحطيم والسرقات ..وهم ناس مهره ومتخصصين بعد .. والفرق بينهم وبين ( الهاكرز ) ان الهكرز... مثل ما قلت... ناس خيرين سخروا مهاراتهم في التطوير .. بينما ( الكراكرز ) هم اللي يستخدمون مهاراتهم في التخريب والسرقه .. ومن اشهرهم ( كيفن ميتنيك ) اللي قدر يسرق ميتين الف ( 200000 ) بطاقة ائتمان عام الف وتسعمية وخمس وتسعين ..

عقب خالد على كلامه وقال :خالد : أفهم من كلامك ان الفرق بين الهكر والكراكرز هو فرق أخلاقي ، يعني ( الهاكرز ) يبتكر ويخترع ... و( الكراكرز ) يخرب ويسرق ..

جاوبه عادل بحماس :.
عادل : بالضبط ..

سكت خالد فتره وهوه يفكر وبعدها قال :
خالد : والتجسس اللي ايسوونه الشباب ... شو انسميه ..

ابتسم عادل وقال :
عادل : شوف يا خالد ... نوايا الشاب العربي بشكل عام تعتبر طيبه اذا ما قارناها بنوايا الشاب في الغرب .. الشاب العربي هدفه انه يتسلى او يلعب.. وابشع شيء ممكن ايسويه انه ينتهك حرمة كمبيوترات البنات وينسخ صورهم .. بينما الشاب الغربي نوايا غيره .. الغربي ما يدور صور او يلعب ... الشاب في الغرب هدفه الفلوس او التخريب .. يعني ( الكراكرز في الغرب ) يسرق البطاقات ويخترق كمبيوترات الشركات لسرقة اسرار المناقصات وغيره .... وفي ها الحاله ... الشاب العربي ....ما يوصل لدرجة ( الكراكز ) من حيث الشر الكبير اللي فيه ... وبنفس الوقت ما يعتبر ( هاكرز ) يعني لا هذا ولا ذاك ..
اتساءل خالد بدهشــة :
خالد : عيل ليش ايسمونهم ( هاكرز( !!

ضحك عادل وقال :
عادل : مثل ما قلتلك .. الهاكرز في العاده هم الناس الطيبين .. وبما ان الشاب العرب طيب في العادة ، سمى نفسه ها التسميه وابتعد عن تسمية الشر اللي هيه ( الكراكرز ).

سكت خالد فتره وبعدها قال :
خالد : المهم الحين ... خلنا من ها التفاصيل الممله وقولي شو تبى اتسوي ..

حرك عادل راسه وقال :
عادل : يعني عقب ها الكلام كله ما فهمت .. بنحاول نخترق كمبيوتر البنيه اول ما تتصل في النت .. ونتحكم فيه ونسيطر عليه سيطره كامله .. ونفتح البرامج اللي نباها ...

اتغير ويه خالد وقال بعصبيه واضحه :
خالد : بس هذا حرام وما يجوز .. عيب نتجسس على اسرار الناس .. ونتلصص على خصوصياتهم ..

جاوبه عادل بهدوء :
عادل : مرات الواقع يفرض علينا اشياء احنا رافضينها بالاساس ..
صرخ خالد :

خالد : أي واقع هذا اللي ايخلينا ننتهك حرمة الناس واسرارهم الخاصة ؟!!

صمت عادل فتره وكأنه يحاول امتصاص ثورة الغضب عند خالد وقال :
عادل : عندك حل ثاني ....

شعر خالد بألم وغصه وحسره .. وقال بمنتهى الأسى :
خالد : للأسف ما عندي حل ثاني ... والظاهر أن الواقع يحمل في طياته الكثير من الآلام .... بس شوف .. هذي اول وآخر مره تستخدم هالبرنامج فهمت ...

وبابتسامه خفيفه جاوب عادل :
عادل : انشا الله على أمرك ...

قعد عادل على الكرسي ، وبدا بتشغيل البرنامج ، وتعديل الخيارات ، واثناء ما كان ايعدلها التفت لخالد وقال :
عادل : ها لبرنامج فيه خيار اضافي ، وهو انك تقدر اتعرف رقم تلفون الطرف الثاني المشبوك بالكمبيوتر اذا كان يتصل من تلفون عادي بنظام الديل آب ( dial_ up ) ..

رد عليه خالد بعصبية شديدة :
خالد : لا طبعا .. هذا سؤال تسأله .. الغي ها الخيار بالحال...مهمن كانت الاسباب والظروف... حرام وحرام انعرف هالشي حتى لو ما فادنا بشيء ..فهمت ..

سكت عادل فتره وبعدها قال :
عادل : وفيه شي ثاني لازم اتعرفه ..

اتساءل خالد بضيق :
خالد : شوه بعد ؟!
جاوبه عادل بهدوء :
عادل : البرنامج ما بيشتغل اكثر من خمس دقايق.... من لحظة ما تشتبك مع الكمبيوتر ثاني ..

سأله خالد بدهشه :
خالد : ليش ؟

جاوبه عادل باسهاب :
عادل : مع ان البرناج قوي ومعقد .. الا ان الحمايه فيه ضعيفه شوي وممكن ينكشف من قبل شركة الاتصالات في غضون حوالي ست دقايق .. وعشان جذيه انا حاطه فيه ساعه توقيت اتعد تنازليا .. وأول ما تخلص الخمس دقايق بيسكر البرنامج ومعاه الكمبيوتر ....حرك خالد ايده بتوتر وقال :
خالد : اتمنى اتكفيني ها الخمس دقايق ..

استمر عادل في شغله... وبدأ بتجربة البرنامج .. ولما انتهى قال :
عادل : كل شي تمام ..البرنامج شغال بكل كفاءه ... بس البنيه مب على النت .. ولازم نتريا شوي ليما تدخل النت ..

رد عليه خالد بتوتر :
خالد : بنصبر .. ما النا غير الصبر ...

وفي ها الاثناء كانت مريم قاعده في غرفتها و تقرأ في كتاب ...واتذكرت لحظتها أن ( موجه ) مادتها .. مادة ( التربيه الخاصه ) طلب منها اعداد بحث عن ما يسمى بـ ( التوحد ) .. واتذكرت ان ( الموجه ) عطاها مواقع على النت خاصه بها الموضوع .. واتذكرت بعد.. انها ما حصلت المراجع الكافيه لبحثها .. ولهذا قررت وعلى مضض انها تفتح النــت لاول مره من ست شهور كامله ولدقايق معدوده .. ليما اطلع المعلومات المطلوبه .. لكنها اتفاجأت بنسيانها للباسورد الخاص بدخول الشبكه .. ولهذا.. قامت من مكانها وسارت عند اختها ظبيه عشان تتسلف منها باسوردها ...

وعلى الطرف الثاني ما زال خالد وعادل ينتظرون على النت والبرنامج مفتوح .. وخالد قاعد ينتظر وكأنه واقف بقلب الشمس من شدة لهيب قلبه واحتباس انفاسه ...

و لهذا ..حاول خالد انه يكسر حاجز الصمت والانتظار وسأل عادل :
خالد : الا قولي يا عادل .. كم سنه باقلك وتتخرج من معهد الطيران ..

جاوبه عادل بهدوء وعينه معلقه على الشاشه :
عادل : على السنه اليايه بكون متخرج انشا الله ..

اتساءل خالد مره ثانيه :
خالد : واول ما بتتخرج بتتعين طيار مدني في شركه من شركات الطيران المحليه ..

ضحك عادل بهدوء وقال : .
عادل : لا .. وينك .. يوم بتخرج وبحصل على رخصة الطيران بكون انجــزت ( 320 ) ساعة طيران .. وشركة طيران الامارات تطلب الفين ( 2000 ) ساعة طيران على الاقل عشان اتعين بوظيفة طيار ..يعني لما اتخرج بشتغل بوظيفة مساعد طيار ليما اكمل الساعات المطلوبه ..
سأله خالد باهتمام :
خالد : انزين ليش ما تكمل الالفين ساعه طيران في المعهد نفسه .. لانك بهذا بتكتسب خبرات كبيره على يد متخصصين في الطيران ..

ابتسم عادل وقال :
خالد : يا خالد .. انتي تدري اني مسافرادرس على حسابي الخاص .. يعني من جيب الوالد .. وتكاليف دراسة الطيران عاليه وايد ... انته تدري ان ساعة الطيران الوحده اتكلف ( 150 دولار ) !! يعني لحد الآن انا صارف حوالي ( 300 ) الف درهم مصاريف معهد وسكن وغيرها .. واذا بكمل الالفين ساعه محتاج لمليون درهم .. وحرام اخسر ها المبلغ وانا اقدر أدرب في شركة من شركات الامارات الوطنيه .. طيران الامارات و ..

قبل لايكمل كلامه .. سمعوا صوت صادر من الكمبيوتر .. ومعنى هذا الصوت... ان الكمبيوتر المراد اختراقه ... دخل الشبكه ...

وبها اللحظة كانت مريم داخله النت .. وفتحت موقع البحث المعروف جووجل ( google ) وكتب عنوان الموضوع المراد بحثه .. وضغطت زر الارسال .. وبعد ثواني .. طلعتلها عدة مواضيع .. واختارت الموضوع اللي شافته مناسب واللي كان عن مفهوم ( التوحد ) .. وفعلا ومع اول محاوله طلعتلها كلمة التوحد .. وشافت كلمات على الشاشه توضح مفهوم التوحد وكانت اتقول : التوحد هو إعاقه متعلقه بالنمو وعادة ما تظهر في السنوات الثلاث الاولى من عمر الطفل و ....

وبسرعة البرق انفتح جدامها برنامج الماسنجر... مع انها ما حاولت اساسا فتحه .. ومع هذا... حاولت توهم نفسها انها ضغطت عليه بالغلط

حاولت مريم اغلاق البرنامج اكثر من مره لكنها ما قدرت . .. وهذا بسبب السيطره الكامله الموجهه ضدها من جهة الجهاز الثاني .. واثناء ما كانت اتكرر المحاولة اتفاجأت برساله مكتوبه اتقول :
خالد : ( الام _ الواقع )..

ارتبكت مريم يوم شافت اسمها الرمزي السابق واستهلكت وقت طويل في التفكير ومحاولة تفسير للي قاعد يصير وفي النهايه قالت :
مريم : منو انت ... وكيف دخلت علي ؟!!

كتبلها خالد بسرعه وهوه يطالع ساعة الكمبيوتر اللي اتعد تنازليا :
خالد : مب مهم كيف دخلت .. المهم... لازم اتعرفين اني خالد .. خالد اللي كان يراسلج قبل ست شهور .. وقطعتيه فجأه ..

سكتت مريم فتره طويله وهيه اتفكر و تستهلك المزيد من الوقت وفي الآخر كتبت وبمنتهى العصبيه :
مريم : وشو تبى مني .. مب كفايه اللي سويتوه فيني ... تبون اتكملون آخر فصول جريمتكم وتقضون علي نهائيا ... لو سمحت سكر هالبرنامج .. او اني بسكر الكمبيوتر نهائيا في ويهك ..


كتبلها خالد باسلوب توسل ورجاء :
خالد : الله ايخليج .. اصبري دقايق بس .. وبعدها اوعدج اني ما اتعرضلج نهائيا على النت ..

ردت عليه مريم بضيق بلا حدود :
مريم : قول بسرعه وخلصني ..

كتبلها خالد بكل سرعته في الطباعه :
خالد : سؤال واحد بس .. ليش ما اتصلتي هذاك اليوم بأختي ..

ردت مريم بانفعال وغضب ثائر :
مريم : اسأل اختك ..

كتبلها باستغراب وعجب :
خالد : اختي ؟! شو فيها اختي ... اختي قالت انج ما اتصلتي فيها ..

ردت عليه مريم بعنف :
مريم : لا والله ... انا ما اتصلت ؟! انا اتصلت فيها وهزئتني آخر تهزيء .. وعايرتني بطلاقي .. ومسحت بكرامتي الارض وذلتني آخر ذل ...وحطمت كل نبضة احساس ومشاعر بقلبي ... وانا شاكه انك مشترك معاها باللعبه بعد .. او يمكن ما اتكون اختك اصلا ..

اندهش خالد من كلامها حتى انه نسى التوقيت الزمني واللي قاعد يمر بشراهه ولما انتبه له مره ثانيه كتب بسرعه :
خالد : معقوله؟ روضه اختي اتسوي جذيه ! معقوله ؟!

ردت مريم بانفعال متصاعد وكتبت :
مريم : هيه معقوله... وسوتها فعلا .. والحينه... أي اسأله ثانيه ..

رد عليها خالد بكل يأس واحباط الدنيا :
خالد : ما عندي أسئلة ثانيه.. بس حبيت اقول... وقبل لا افارقج نهائيا .. اني ما ادري ابــدا عن اللي سوته اختي روضه .. وانتي حره... اتصدقين ولا لا .. مع انج تقدرين تستفين قلبج وهوه يجاوبج..

كتبت مريم بكل مراره :
مريم : انا قلبي مات من زمان .. من يوم ما اطلقت.. وموتته مره ثانيه اختك أو صديقتك .

تابع خالد كلامها وكأنه ما انتبه لحروفها الاخيرة :
خالد : وبغيت اقولج بعد ... ان روضه بعدها شابه صغيره وما عارفه ولا خابره الحياه زين .. وفي كل الاحوال... روضه الحين اتسهلت وعرست وقاعده في بيت ريلها في ( القطاره ) .. والله ايهديها.. ويسامحها ..

كانت مريم على وشك انها اتسكر الكمبيوتر نهائيا حتى بدون ما تقرأ الباقي من كلام خالد .. ولكن .. شدتها حروف خالد الاخيره لحظة ما ذكر المنطقة اللي متزوجه روضه منها وهيه ( القطارة ) ... وبدون تفكير دفعها الفضول لثواني وقالت بدون وعي :
مريم : زوج اختك من ( القطاره ) .. انا بعد من ( القطاره ) ..حست مريم بندم وحسره بعد ما ارسلت جملتها الاخيره لأنها كشفت مكان سكنها .. ولهذا تابع خالد بسرعه كبيره بدون ما يهتم كثير بمكان سكنها :
خالد : هيه من القطاره ..

سالته مريم باهتمام وفضول متزايد :
مريم : وريل اختك .. شو اسمه .. يمكن حد من جيرانا ..

كتبلها خالد بهدوء وعلامات الاحباط تنخر بعظمه :
خالد : اسمه راشد بن عوض الـ .......... .

صرخت مريم يوم شافت اسم ريل اخت خالد.... وحطت اياديها الثنتين على خدها في حركة لا إرادية وكتبت بكل سرعه وتوتر :
مريم : مب معقوله ابدا ..

سألها خالد باستغراب :
خالد : وليش مب معقوله :

رد مريم بسرعه وارتباك :
مريم : راشد هذا.... طليقــــي!!!! ..

اتراجع خالد للخلف من عنف الدهشه والاستغراب .. وكتبلها بكل أهتمام ودهشة
خالد : معقوله!! .. زوج اختي ... راشد بن عوض.. يصير طليقج ..

ردت مريم عليه بسرعة :
مريم : هيه طليقي وولد عمي.. بس انتوا... ما كنتوا تدرون انه معرس من قبل ..

اتوقف خالد لحظات عن الكتابه وهوه يرجع بذاكرته لماضي قريب وبعدها كتب :
راشد : الصراحه ابوي هو اللي سأل عنه.. وقالوله ان راشد ريال من عايله محترمه وابوه ريال معروف... وماظني يدري انه كان معرس.. وبعدين ابوي شاور اختي روضه وكانت راضيه وفرحانه فيه بعد .. والحينه كملت شهرين وهيه معرسه .. وعمري ما سمعت انه على خلاف مع ريلها ..

انخفض انفعال مريم شويه وقالت بكل صدق واخلاص :
مريم : رغم كل اللي سوته فيني روضه .. انا والله ومن كل قلبي مسامحتنها .. واتمنالها التوفيق في حياتها مع ولد عمي .. وانشاالله راشد يهتدي على ايدها و ..

قاطعها خالد بكلمات جديده :.
خالد : تعالي .. قبل اسبوع واحد شفت اختي روضه هنيه في بيتنا وكانت مب طبيعيه ابدا .. و كان ظاهر عليها علامات حزن خفيه و ..

ومع آخر كلمه كتبها وارسلها خالد .. انتهت الدقايق الخمس..وانقطع البرنامج ومع انقطاعه سكر الكمبيوتر مره وحده ..
ومع تسكيرة وانغلاق الكمبيوتر... سمع راشد صرخة فزع قويه وبصوت عالي ومرعب.. وعرف بحدسه أن مصدرها أمـــه واللي كانت قاعده تحت في الصالة مع ابوه ...

ومباشرة... فز خالد من مكانه واتحرك بخطى سريعه ومرتبكه وطلع من غرفة عادل ونزل على الدرج بسرعه وأول ما وصل لمنتصف الدرج .. لقى امه واقفه وهيه حاطه ايدها على راسها والدمعه تنساب بحرقه من عينها .. وابوه كانت واقف مثل التمثال.. وهوه يطالع باتجاه مكان معين من البيت .. ولما التفت خالد لنفس المكان اللي يطالعه ابوه.. واللي هو باب الصاله الكبير .. لقى أخته روضه وهيه شاله شنطة ثيابها والدمعه مغرقه عينها واللي اختلطت مع الدم النازف من جبهتها .. وآثار الرضوض والكدمات ظاهره على ويها .. واعاصير من الألم والقهر محاصره كيانها ...

لحظتها بس .. عرف خالد .. ان روضه دخلت في عالم جديد.. وبتحمل لقب جديد ...... لقب مطلقـــــه ...
وان روضه بتشرب من نفس الســم اللي عايرت غيرها فيه .. ومن يـد نفس الشخص ....
وانه بانتظارها ....عالـــم شنيع وفظيع من ألآلام ..
آلام الواقــــــع...

تــــــــــــــــابعوا معي للنهايه

آلا لام الواقع روايه اجتماعيه

تناقش مشاكل عديده .....فآلالام الواقع لم تنتهي بعد

مشكوره دلع وفي نهاية الجزء أحداث مهمه
وفيها عبره كبيره
ولا تتأخرين علينا

آلام الواقــــــــــــــــــــــع - الجـــــــــــزء الســــــادس

*****************
(( هذا وحش .. لا يمكن ايكون انسان ابدا ))

بها الكلمات نطقت روضه وهيه ماسكه منديل ابيض وتمسح فيها دموعها اللي رافضه التوقف ولو لثواني من عيونها .. وعلى بعد امتار منها .. واقف خالد .. واللي صعد معاها لغرفتها ... وتابعت روضه كلامها وقالت بكل بلوعه وجزع :
روضه : ما تتصور يا خالد بشاعة ها الانسان وقسوتــه .. كل ما حاول اصلحه يزيد شراسه وقسوه .. واليوم.. وبعد ما طفح فيني الكيل .. ما تمالكت اعصابي ورميته بمزهريه صغيره وقعت تحت نظري .. وصابته المزهريه في ركبته .. وسال الدم منها ... وبعدها ..ما شفت منه الا الويل .. مسكني بقوه وضرب راسي في الطوفه ..واتناول العقال.. وظل فتره وهوه يجلدني وبدون رحمه .. وبعدها.. قال بمنتهى البرود والسفاله انتي طالق وبالثلاث ..

مع آخر كلمه نطقتها روضه رفعت كفيها.. وغطت ويها.. واستمرت في موجه حاره من الصياح والنحيب ..
وخالـد .. كان محتار .. هل ايعاتبها على اللي سوته في مريم ..او يواسيها على ما اصابها من مصيبه ... ولهذا آثر الصمت .. وما علق على كلامها وانتظرها ليما تهدأ شوي .. لكنها ما هـدت.. وتابعت كلامها وقالت بمـراره :
روضه : اتصور يا خالد .. راشد طلع معرس قبل لا ياخذني .. يعني غشني الجبان .. وما عرفت انه معرس الا بعد شهر كامل من زواجنا ..

اطالعها خالد بنظرات حاده وقال بصوت واطي :
خالد : ادري .. ادري انه معرس.. قبل لا ياخذج ..

التفتت روضه بحركة حاده واطالعت خالد بدهشه وقالت :
روضه : تدري؟! ... كيف تدري؟! .. ومن متى تدري ؟! ..

سكت خالد فتره بسيطه وبعدها جاوب بهدوء :
خالد : دريت اليوم .. وبالتحديد.. قبل لا تدخلين بدقايق بس ..

اتساءلت روضه باستغراب شديد :
روضه : ومنو خبرك ؟!

ابتسم خالد بمراره وقال :
خالد : نفس الانسانه اللي عايرتيها بطلاقها هذاك اليوم .. قبل ست شهور .. تذكرين ولا اذكرج ..

زاد ارتباك ودهشه روضه وما عارفت شو اتقول .. ولهذا نزلت راسها للارض وطال صمتها وفي النهاية قالت بصوت خافت والاحراج بادي على وجهها بشدة :
روضه : انته عرفت ...

سكتت روضه لحظات قصيرة لكنها تابعت بانفعال وقالت :
روضه : وها البنيه .. كيف عرفت بزواج راشد السابق ؟!!

اطالعها خالد بنظره ناريه وقال :
خالد : لان البنيه هذي.. هيه الزوجه الاولى لراشد طليقج ...

فزت روضه من مكانها من فرط المفاجأه وظلت تتطالع راشد بكل استغراب وقالت بتوتر :
روضه : معقوله؟! معقوله الكلام اللي اتقوله !!.. هالبنيه .. هيه نفسها زوجة راشد الاولى !!! .. يعني انا اتسببت لعمري بكل هذا !!.. و لو ما قلت هاك الكلام القاسي و الجارج الهـأ .. كان ممكن اتحذرني من راشد ..

جاوبها خالد بجزء من آيه كريمه وقالها بخشوع :
خالد : (( وما ظلموا ولكن كانوا انفسهم يظلمــــون ))

اتساءلت روضه بعجب :
روضه : معقوله!! اخــت ظبيه .. هيه نفسها البنت اللي كلمتها هذاك اليــوم !!
جذبت كلمات روضه الاخيره اهتمام خالد فسألها :
خالد : ظبيه؟!! .. ها البنيه عندها اخت اسمها ظبيه ..

حركت روضه راسها بايجــاب وقالت :
روضه : هيه.. اسمها ظبيه .. وانا كنت اشوفها مرات لمــا كانت اتزور عمي ابو ريلي واللي يصير عمها طبعا... وهيه اللي خبرتني ان ولد عمها راشد كان متزوج اختها مريم ..

حس خالد بموجه من الارتياح يوم عرف اسم البنيه ولهذا غمض عينه وقال بصوت حالم :
خالد : ياســلام ..اسمها مريم ... على اسم اشرف واطهر نساء الكون .. مريم بنت عمران ....و

قاطعته روضه وهيه اتقول بحماس :
روضه : بس صراحة .. انا وايد معجبه بظبيه .. بنيه عاقله وحنونه وحكيمه و عقلها كبير و ..

أكد خالد على كلامها فقال بمنتهى الثقه :
خالد : ومريم ما تقل عنها عقل وحنان ...

عقبت روضه على كلامه بهدوء وقالت :
روضه : أممم .. ممكن .

سادت لحظات صمت طويله بعد كلمة روضه الاخيره .. لكن.. ما لبثت ان انفعلت روضه وقالت بصوت عالي :
روضه : انا لازم اصلح غلطي .. لازم اعتذر لها الانسانه المظلومه مريم .. واحب على راسها عشان اتسامحني .. وبعد هذا.. لازم اكفر عن ذنبي واجمع بينكم .. مثل ما فرقتكم من قبل ...

ابتسم خالد بفرحه وقال :
خالد : صدق يا روضه صدق ....

جاوبته روضه بحزم :
روضه : هيه صدق ..

اتساءل خالد بهلفه :
خالد : وكيف بتتوصلين الها ..

جاوبته بثقه :
روضه : من ناحية الوصول اطمن .. انا وظبيه صرنا ربع.. وما بتنقطع علاقتي معاها بسبب طلاقي من ولد عمها .. انا باتصلها وبحدد معاها موعد وبكلمها بالموضوع وبقابل مريم وبستسمح منها .... انا ما برتاح ولا يهدالي بال الا يوم اتسامحني ..

مد خالد ايده ومسح الباقي من دموع روضه وقال :
خالد : الله ايخليج النا يا روضه .. ويعوضج بريال صالح ... انا ادري ان الطلاق صعب .. لكن .. هذا قدر من رب العالمين ولازم نرضى فيه ...

نزلت روضه راسها للارض وقالت بأسى :
روضه : احمدك على كل حال يارب ... صحيح اني بمر بفتره نفسيه صعبه .. لكني بحاول اتكيف مع وضعي اليديد على قد ما اقدر .. لازم اواجه الواقع و اقاومه بكل مراراته .. لان الاستسلام له اكبر هزيمه ..

ابتسم خالد من كلام اخته وقال :
خالد : صدقتي ..

تابعت روضه كلامها وقالت بصوت خافت :
روضه :... وقبل لا اطلب من الله العون والمساعدة ... وعشان اقدر اقاوم وضعي بكل شجاعه.. لازم اصحح كل الاخطاء الكبيره اللي ارتكبتها بحق ها الانسانه وبحقك يا خالد ... وانشا الله بعد كم يوم .. وبعد ما تهدأ نفسيتي شويه .. بسير بنفسي وبصلح كل اللي انكسر ..

مسك خالد راس اخته وحبها بنعومه عليه .. وقالها بكل حنان ..
روضه : الله ايخليج يا روضه .. ولايحرمنا منج ..

حطت روضه عينها بعين خالد واتسربت دمعه من عينها وقالت بصدق وحنـان :
روضه : ولا يحرمنا منك يا خالــــــد ....

ابتسم خالد للحظات قبل لا يتحرك مغادرا الغرفــه ..
وقلبــه مليان .. شوق..
وأمـــل ..

*****************************************
*****************************************

بعد مضي يومين .. كانت روضه راكبه مع خالد بسيارته وبطريقهم لبيت مريم .. بعد اتصلت روضه بظبيه وحددت معاها الموعد ..

واثناء ما كانوا بالطريق .. اتساءل خالد فقال:
خالد : اشكثر بتمين عندهم ياروضه..

جاوبته روضه بعد تفكير بسيط :
روضه : مب وايد . ساعه او ساعتين بالكثير ..

سكت خالد شويه ثم قال :
خالد : وشو بتسوين عندهم بالضبط ..

ومع ابتسامه خفيفه جاوبته :

يعطيك العافية يادلع سنكون جميعاً بإنتظارك.

يسلمووووووووووووووو

خيتوووووووووووووووووووووو

على القصة الحلوة

وانا كمان في انتظارك في اقرب فرصة اتمنى لك السعادة والتوفيق