ولــــــــــــــــــــــــد العم ... روايه اكثر من روعه..وربي كلمة روعه قليله بحقها.

الجزء الثامن
============

بقى اسبوع .. وحمد يرد البيت .. ام حمد الدنيا مو سايعتها, وبو حمد الاسعد منها ,لان ولده خلاص راح يرد لهم من بعد الغيبه الطويله والغربة اللي على الرغم من طولها ما نسته اهو منو ولا اهو من وين ..

في بيت بو حمدان الفوضى كانت اخف شوي من بيت بو حمد بس سمر ما خلت احد ما خلته يقوم ويعدل ولا يروح بيت عمها حمد ويساعدهم في الاستعدادات حق ييه حمد
واهي حاسه حالها بتطير من الفرحه .. نصور ومشعل مستغربين من اختهم .. اهم يدرون انها تحب حمد وايد وتعزه .. بس انها تسوي فيهم اللي تسويه .. هاذا اللي ما يستوي .. كانوا يتكلمون عنها برع يم السيارة واخوهم حمدان توه واصل .. ومبين عليه فرحان موووووووت
طلع من السيارة واهو يسلم عليهم
حمدان: صباح الخير يا اخواني
الاثنين بظيج: الله بالنور
حمدان: اشفيكم ؟ (واهو يحط ذراعه على كتف نصور) ها حبيبي نصور .. اشفيك خو قلبي؟
ناصر واهو يباعد يد اخوه عنه: هاذي المينونه اختك.. ماذيتنا روحو .. وتعالو.. حطوا .. وشيلو.. مللتنا .. أللي يقولون ريلها راد من السفر مو لد عمنا ..
مشعل: حتى بيت عمي ماكو استعدادات كثر استعدادات بيتنا
حمدان: هههههههههههههههههه انتو نسيتو ان سمور وايد متعلقه في ولد عمنا اكثر منا يااخواني
مشعل واهو يهز مفاتيح السيارة في ايده: والله ينخاف من بعد هالتعلق شنو بيطلعنا؟
حمدان : مشعل .. شهالكلام
مشعل واهو للحين متظايج: ماعليك مني ما رقدت زين
ناصر: يالله يا مشعل عشان تقطني بعدين بيت ارفيجي
مشعل: تبي تشرد يالاربد هاا؟
ناصر: أي اشرد ؟ انه اصلا بروح اشوف خدامتهم اليديده اللي طايح فشار بها جدام الربع
حمدان: ههههههههههههه صج انك حمار
ناصر : هههههههههه طالع عليك
مشعل: ايا الملاعين .. لكن تدري عاد .. ما تنزل من السيارة قبل ما تخليها اتييب لي قلاص شاي من ايدها
ناصر يهز راسه مثل الهنود: ان شالله بابا مشال
حمدان :ويلاه هم هنديه
ناصر: انه هاذا اللي شاقني .. هنديه هههههههههههههههههه

وراحو مشعل وناصر لبيت عمهم بو حمد وحمدان دخل البيت واهو متونس كبر الدنيا
لان ابوه اليوم كلم عمه بس اهو ما عرف اخر التفاصيل لان امه متصله فيه تبيه في شغله

في بيت بو يعقوب .. الجو كان هادي ولا كانه حمد بيرد السفر .. يعقوب كان قاعد يم المسبح واهو ياكل في التفاح ليما خلص .. التوتر اليوم اللي فيه غير عن كل يوم .. لانه قرر انه يدق على سمر .. وصار له من الصبح للحين واهو يقول بدق عليها وبدق عليها .. مد يده حق سله الفواكه شافها خالية .. تأفأف وقال في خاطره .. حزته هالتفاح يخلص .. مرت سارة عليه وشافته مكشر ..

سارة: اشفيهم الحلوين مكشرين ؟
يطالعها يعقوب باحتقار
سارة: هو .. اشفيك تطالعني جذي؟ ماكله حلالك ويا ويهك
ما رد عليها يعقوب وفر ويهه عنها
سارة: الحمد لله والشكر اقول باي
مشت سارة عنه بس اهو وفقها ..
يعقوب: ساروووو
سارة طالعته بنفس النظرة اللي كان يطالعها: نعم
يعقوب: نعامه ترفسج ...وين رايحه
سارة: وين بروح يعني .. بروح داخل البيت يالفطين
يعقوب: بلا طواله لسان وياي فهمتي
سارة: والله شراح تسوي يعني
تقرب منها يعقوب واهو حمقان ومتنرفز وشد شعرها: بشق حلج هاذا اللي بسويه
سارة تتلوى من الالم : هدني يالكريه والله انك راعي مشاكل
هد شعرها واهي دزته : اشفيك انت .. ليش تشد شعري ؟
يعقوب : بس كيفي
سارة: لا والله
يعقوب : أي والله .. بعد اللي انت سويتيه تستاهلين اكثر من جذي
سارة مستعجبة: اللي سويته شنوسويت انه ؟
يعقوب : تتغيشمين ويا ويهج ..
سارة: لا اتغيشم ولا غيره .. انه ما سويت شي الحمد لله
يعقوب: وسمور الحمارة .. هم ما سويتي شي
سارة مستغربه بس حست حالها فاهمه للي يقوله اخوها: اشفيها سمور .. الحمد لله ابخير
يعقوب: انتي وين ايي الخير وياج .. ما تشوفين شسويتي فيها غيرتيها من فوق لحدر وتقولين مافيها شي
سارة: اهااااااااا .. ولا برايها اهي انه سويت اللي سويتيه مو غصبن عنها .. وانت ليش محتر .. والله ما عندك سالفه
يعقوب: سارو بلا طواله لسان
سارة: قول الا انت بلا سوالف فاضيه .. ما عنده لا شغل ولا مشغل وايي يتحرش فيني .. والله اللي سوته بنت عمي اعقل شي .. لمتى راح تعيش مثل الصبيان لا تعرف للبس البنات ولا غيره .
يعقوب: وانتي برايك اللي تسويه صح
سارة: صح؟ صح ونص
ييعقوب: ذلفي ذلفي قيل لا احذفج في المسبح يالله ذلفي
سارة: بروح ما يحتاي تقول لي .. ( مشت عنه لكن التفتت له مرة ثانيه) لكن يااخوي لو انه مكانك جان عدلت من اسلوبي لانه ماراح ينفع
يعقوب استعجب : شقصدج يالملقوفه هاا.؟؟
سارو مشت عنه واهو للحين يكلمها ... (شقصدها هالخبله؟؟) سؤال حاير لعب في مخه لباجي الصبح ليما اذن الظهر وراح يصلي وقرر يوم طلع من المسيد انه اول ما يوصل البيت يتصل في سمر

وطبعا ... مر الظهر .. والعصر ... والليل .......................... ويعقوب للحين مااتصل

بعد العشا في بيت بو حمدان .. مشعل وناصر كانو قاعدين يدندنون على العود وحمدان يالس حذال ابوه وابوه ما عطاه ويه ابدا حاقرنه وقاعد يتكلم ويا ام حمدان وناصر حس بان اخوه متوتر لذا راح وقعد يمه
ناصر: ها بشر؟
حمدان : شنو؟
ناصر:شقال ابوي
حمدان:ماادري .. ولا اهوراضي يقول لي شنو رد عليه عمي وماعطني ظهره
ناصر: هههههههههههه مسيجين اخوي
حمدان بضيج: اووووووف نصور مو حزة ذرابتك اللحين اوكيه
ناصر: اوكيه اوكيه لا تبلعني
ناصر: سكت نصور عنه وقام ويلس مرة ثانيه ويا مشعل
مشعل: اشفيه حمدانو اليوم مو طبيعي كلش
ناصر: هههههههه
مشعل: وانت بعد اشفيك استخفيت يالس تضحك لحالك
ناصر:ههههههههه لو تدري جان انت بعد ضحكت
مشعل: قولي عشان اضحك

وقال نصور حق مشعل كل شي ومنها كل ماافتر حمدان حق نصور ومشعل شافهم يضحكون عليه واهو يزيد حمقه
وما يازو عنه وقاوم يغنون عليه اغنيه :: ااخ يا قلبي ياللي .. منشغل في هواهم .. دامهم ما يبونا .. ليش حنه نبيهم .. ليش نمشي وراهم .. ونتمنى رضاهم .. الله يا قلبي اغلى ليش نسال عليهم ::
حمدان ثور وخلاص قام ... راح صوب ابوه وبدى يتكلم وياه
حمدان: يوبا
هلا يوبا
يوبا ماقلت لي ( حمدان متردد لكن نظرات الملاعين مشعلو ونصور المستهزئة شجعته) شنو قال لك عمي عن ....... عن ........
عن ..... عن ........ عن شنو ؟
يوبا الله يهداك ما تذكر
لا مااذكر يا ولدي ذكرني
حمدان حس ان الدنيا سكرت في ويهه لانه خلاص ما يقدر يسكت قلبه الولهان على بنت عمه
يوبا تكفى لا تلعب بعصابي
هههههههههه والله ويا ولدي ماادري عن شنو تتكلم ؟
بس خلاص ماكو شي سلامتك
قام حمدان من عند ابوه وويه مسكر وخاق لونه والدمعه شوي وتطلع من عينه ليما سمع ابوه ينادينه
الاب: على فكرة يا حمدان
التفت حمدان لابوه: نعم يوبا
عمك عطاني كلمته عن موضوعك وموضوع بنت عمك
ارتجف كل شي في جسم حمدان .. حتى خشمه: و شنو قال؟
قام بو حمدان وويه حزين وهاذا اللي ارهق حمدان حييييييييل اكثر من ما اهو مرهق فكره
بو حمدان: قال لي ... انت تفصل واحنه نلبس
حمدان مااستوعب الكلام: شنو؟
بو حمدان اشرق ويهه: وافق يالهيلق
حمدان طار من الفرحه : شنو . .وافق
أي وافق .. أشفيك؟
وسارة..... حتى سارة وافقت ..؟
قال بيسالها .. لكن اهي وين تحصل مثلك ياولدي
حمدان طار من الفرحه وقام وحظن ابوه وباس يده : مشكور يا بو حمدان .. عساني مانحرم منك
ومشعل ونصور قاموا يباركو حق اخوهم وام حمدان قامت تيبب وحمدان الدنيا مو سايعته
الكل كان مو جود الا سمر

سمر كانت في غرفتها .. قاطه حالها على السرير والاغنيه تشتغل :: غيت عني والشوق جابك .. عمري يالغالي .. هلا بك .::

واهي تبتسم حق الصورة .. كل يوم حبها يكبر ويكبر حق حمد .. وكل يوم قلبها يتوله اكثر واكثر حقه .. اااااااه ياحمد ...... قالت في خاطرها ... لو تدري انه شكثر ولهانه عليك

وقطعت افكارها رنه التلفون باغنيه راشد الماجد مشكلني حبك .. شافت الرقم ما عرفته بس تذكرت هاذا الرقم اهو نفسه الرقم اللي طق لها ذيج المرة واهي ما عرفته يوم كانت في بيت عمها بو يعقوب ..
سمر : الوو
الطرف الثاني: ..........
سمر مرة ثانيه : الووو
الطرف الثاني: .........
والله لك مزاج
..............
وسدت الخط في ويهه واهي تقول بصوت واطي .. والله ناس فارغه .. وردت حق الاغنيه والصورة

رن التلفون مرة ثانيه.. وشالته سمر شافت انه نفس الرقم وقامت تتافاف
سمر: الوووو
الطرف الثاني : ..........
سمر: ما تردون
الطرف الثاني : .......
سمر بعصبيه: صج قله ادب ....... وسدت الخط

الطرف الثاني مثل ما تتوقعون .. محد غيره .. يعقوب اللي قام يرقع راسه بالوساده وشوي ويشقق هدومه واهو يتعفر على السرير ويقول في خاطره .. جبان جبان جبان

الجزء التاسع
============

من بعد ذيج الليلة .. عزمت سمر إذا اتصل ذاك الشخص مرة ثانية راح تساعده بمشكلته وقالت : هاذي المرة إذا اتصل بتكلم وياه عادي...

وظلت تنتظر المكالمة طول اليوم الثاني .. وكل ما رن التلفون ما تخليه يكمل الرنة وترد عليه .. صار الوقت عصر .. وللحين الريال ما اتصل سمر بينها وبين نفسها قالت:: انه أنسى السالفة احسن لي .. الظاهر انه كان يبي يسولف بس .. انه اقوم واروح بيت عمي احسن لي

خلت السايق يقطها اول شي بيت عمها ابو حمد . تسلم على ام حمد وتشو اخر اخباره .. وقعدت ويا وليد شوي تسولف وياه ولان وليد كان الوحيد المتوله مثلها على ردة اخوه حمد .. ظلت فاعده وياه لمده ساعة ونص وبعدين استاذنت منه عشان بتروح بيت عمها ابو يعقوب

اول ما دخلت البيت شافت سارو تركض لها وتقول : وقفي جنجال
سمر ما فهمت عليها: شنو؟
سارة ما عطتها ويه وطلعت بره تنادي على السايق: أي بابو انطر ويعه في قلبك .. وقفت السيارة وتكلمت ويا الهندي جم من كلمه وردت البيت .. سمر تنتظرها و اول ما دخلت هبشتها.
سمر : شصاير اشفيج ..
سارة: لا ولا شي بس اوقف جنجال !
سمر: منو جنجال
سارو: هاذا بابو سايقكم
سمر : ليش شعندج وياه
سارة: بنتزوج شرايج؟
سمر: بالمبارك الطيور على اشكالها
سارة: هههههههههه الله يقطع بليسج من صجج
سمر: ماادري عنج تلاحقين ورى سايقنه ترى اقول لج حرمته عليها لسان و دعاوي توصل للسما
سارة : قلبي ويهج زين five minutes وانه راده لج
سمر: على وين ان شالله
سارة: ولا شي بس بنروح المجمع .. هناك شيوخ وعووش ..
سمر: اوووووووووف
سارة: يالله عاد يالشيخه يالطيبه من زمان ما طلعنا
سمر: أي من زمان تونه قبل يومين رايحين المجمع ولا ناسيه
سارة: أي ادري بس هالمرة البنات عازمينا
سمر: عازمينج ولا عني انه لا ادانيهم ولا يدانوني
سارة: لا والله يحبونج و اول من عزموا انتي
سمر: يالله زين بسرعه لا اغير رايي
سارة: بعد عمري والله بنت عمي
سمر: يالله زين عن الحجي الزايد

سارة راحت واهي تركض عشان تبدل وتتزهب ويطلعون ( والله هاذي سارو متفرغة انه يايه اقعد وياها واهي تطلعني صج جليله حيا)
يعقوب اللي ما شاف النوم قام طلع من حكرة الحجرة اللي فارضها على حاله من بعد خيبة المكالمه ويا بنت عمه واول ما نزل من الدرج شافها جدامه .. وقلبه تولع .. نزل بالعدال واهو يطالعها واقفه بالصاله وماعطته ظهرها ........
(شلابسه هاذي ) سال حاله يعقوب عن ثياب بنت عمه ..
كانت لابسه تنورة جينز للركبه وقميص بني و بوت وشعرها لامته من فوق
سمر حست ان احد واقف من وراها والتفتت له بسرعه وشافت يعقوبو المليغ على قولتها.

سمر: طالع هاذا؟ من وين طالع انت من السجن؟
يعقوب: مو شغلج يالسحلية .. وانتي شلابسه ....
سمر: مو شغلك
يعقوب: انزين اشمييبج .. مو كأنج لوعتي جبدنا 24 ساعة في بيتنا وبسبسة ويا سارو خاطري اعرف انتو عن شنو تتكلمون.
سمر: وانت شعليك انه وسارو ربع بكيفنا نسولف اللي نسولفه انت مو شغلك وثانيا هذا بيت عمي وبيي الحزة اللي تعجبني وانت ما تتدخل اوكيه.

توه يعقوب بيرد عليه ولكن رشود قطع عليه كلامه والهواش وياها
راشد قام يصفر حق كشخه بنت عمه .. ويتغزل فيها
راشد: واو ايه الشياكه دي يا بنت عمي حرام عليج عاد قلبي شوي شوي عليه.
سمر توجه الكلام حق يعقوب: طالع الناس شنو تقول مو ياي تهذر علي وما ادر ي شنو تقول
راشد: ليش شصاير
سمر توها بترد لكن يعقوب قطع عليها
يعقوب: ان كان على الكلام الحلو اقول لج لا تحلمين تسمعين كلام حلو على المصخرة اللي ممصخره حالج بها
سمر بكل كبرياء: من الحرة والواهي
يعقوب: حرة .. حرة من تنورة .. بلييييييييز.. هاذي اذا قدرنا نسمي اللي عليج تنورة.
سمر بنرفزة: بليز واللي يرحم والديك .. انت روح طالع شكلك بالمنظرة قبل اللي يشوفك يقول قاتل لك قتيل ولا ما ادري شنو.
يعقوب بصوت واطي : وعندج عين تتكلمين عن القتل يالمجرمة
سمر ما سمعت الللي قالته: شنو شنو شنو شنو قلت
راشد يحاول يهدي الوضع بيناتهم: يا سمر اخوي ما قصده شي بس خبرج اهو مو متعود عليج حلوة جذي
يعقوب: رشود .......
سمر: أي والله مو متعود .. عمره ما شاف بنات ولا كلم بنات ولا عرف شنو معناة بنات
يعقوب: بنات مثلج ماابي اشوف منهن.. زين؟
سمر واهي تمشي عنه : والله كيفك انت الخسران
يعقوب تضايج حيل منها وما رد عليها وراح المطبخ واهو يتوعد فيها وسمر واقفه مع راشد وسارو لحقت عليهم وطلعو مع بعض

ابو يعقوب كان يتكلم ويا ام يعقوب يوم دخل يعقوب عليهم بالميلس
يعقوب: السلام عليكم
ام يعقوب وابو يعقوب: وعليكم السلام
ام يعقوب: بسم الله الرحمن .. اشفيك يعقوب يمه
يعقوب: مافيني شي يمه سلامتج
ام يعقوب قامت له
=لا يكون مريض ولا شي
-لا يمه مافيني شي ..شويه ارهاق .. ويعدي
=سلامتك يمه .. تبيني اسوي لك شي
-لا يمه سلامتج ماابي شي
=انزين انه اروح اسوي لك شاي يالنعناع يمكن يخف عليك
-على راحتج يمه
=اوكيه حبيبي انت بس اقعد هني ويا ابوك وانه اسويه لك
-ان شالله يمه
=اسم الله عليك يا وليدي ... حبته على يبهته وراحت المطبخ

بو يعقوب يطالع ولده من يوم دخل الميلس ولا تكلم له .. بس يوم شافه شارد حاجاه
بو يعقوب: خير يا وليدي عسى ما شر
-الشر ما ييك يوبا ما فيني شي
--الا فيك طالع ويهك مو حالق ولونك اصفر .. وصار لك يومين ما ييت الشركة
-لا يوبا بس شوي كنت مشغول ويا الخيول ... تعرف موسم الولادة هاذا ولازم اهتم فيها شوي
--أي يوبا بس مو على حساب روحك .. طالع ويهك اللي يشوفك يقول مريض
-لا يوبا سلامتك مافيني شي
وقام يعقوب طلع من الميلس ولا شرب الشاي اللي امه سوته له واهو حاس ان الدنيا مسكرة بويهه ........

دخل داره وسكر الباب وقعد يدور على جهازه و لقاه تحت الوسادة .. لانه كان ينتظر ان سمر تتصل فيه لكن ما اتصلت فيه ولا عبرته وشكلها بعد ما عرفته

توه بيروح الحمام الا ويدق جهازه وخطفه بسرعه عشان يشوف الرقم الا طلع ارفيجه سلطان
يعقوب: هلا سلطان
سلطان: انت يا اخي وينك .. صار لنا يومين ما شفناك .. لايكون ضايع
يعقوب: لا والله بس قاعد بالبيت
سلطان : والله قاعد بالبيت .. يالله قوم بسرعه تزهب بنمر عليك انه و الشباب بنروح المجمع
يعقوب: روحو انتو انه مالي خلق حتى اطلع بره غرفتي
سلطان: هاه شهالكلام .. يالله تزهب لا اشق حلجك الحين
يعقوب: ههههههه
سلطان : طالع هاذا .. يالله بسرعه عندك ربع ساعه
يعقوب: اوكيه انه ناطركم
سلطان: باي
يعقوب: بايات

سد الخط يعقوب ودخل الحمام يحلق ويبدل ثيابه وفي باله ان خلاص .. ما راح يفكر في سمر اكثر .. وانه لازم ينتبه حق اشغاله وحياته مثل قبل.

الساعة اللحين 8 بالليل وسمر وسارة للحين بالمجمع .. ام سمر اتصلت ببيت بو يعقوب عشان تسأل عن بنتها وجاوبتها ام يعقوب انه العيال كلهم راحوا المجمع يتسوقون ..

بس سمر من كثر ما كانت ملانة ما اشترت ولا شي .. حتى الاكل ما اكلته وكانت كل شوي تكلم بنت عمها عشان يردون البيت بس سارة اللي كانت لاهية بالجو تسترجيها عشان تقعد وقت اطول.

يعقوب وربعه كانوا بعد بالمجمع نفسه بس قاعدين بكوفي شوب ثاني .. سلطان اللي حاول يطلع يعقوب من الجو اللي كان حابس حاله فيه عجز منه وخلاه بحاله ..

كل اللي كان يفكر فيه يعقوب اهو بنت عمه.. يا محلاها .. اشكثر حلوة و دلوعة وعصبية وشكثر قلبها جاسي ما تراعي قلبه ولا تسأل عنه .. بس اهي لو تعرف اني اموت فيها جانزين .. بس للأسف انه عمري ما عطيتها الفرصة انها تتعرف علي بطريقة احسن من جذي.. وقرر في نفسه انه اذا شافها مرة ثانية بحاول انه يعدل من اسلوبه وياها ..

كان يعقوب سارح في افكاره .. يوم يو ربعه سلطاني وزيد واهم مستانسين ايستغرب يعقوب منهم ..

يعقوب شالسالفه كل واحد شاق حلجه من الوناسه
سلطان وين الواحد ما يتونس يا حبيب قلبي والعين تشوف كل هالحلا والجمال
يعقوب الحمد لله والشكر انت مو صاحي
زيد لو تشوف إلى شفناه يا بو يوسف جان سويت مثلنا واكثر

يعقوب حس بالأثارة من اللي قاعدين يقولونه

يعقوباشوف منو؟؟
سلطان يتكلم وموجه كلامه حق زيد
سلطان شنو غزال؟
زيد احلى من الغزال
سلطانشنو حلوة
زيد احلى من الحلا

بقية الجزء التاسع

حس يعقوب بالظيج لانهم مو راضين يشاركونه بالموضوع

يعقوب يالله عاد تكلم لا ادوسك

سلطان يطالعه بنظرة عتب وملام

سلطان مو انت حاقرني طول الطلعة خلك ما تدري .. قلعتك
يعقوب هههههههههههههه يالله عاد بو قلبي لا تزعل

سلطان عجبه دور الحريم وزيد في دلاله واهو يقول له : ماني ماني
يعقوب قرب كرسيه من كرسي ارفيجه اللي ما عطه ظهره واهو يرجى فيه ويتذلل

يعقوب يالله عاد حبيب قلبي سليطين .. انه يعقوب ما تقول لي
طالعه سلطان ويحذر فيه
سلطان تبطل حركات مراهقين
يعقوب بطلنا
سلطان ترفع هالبراطم الممدودة بشبر اللي يقولون جميل جمال
يعقوب هههههههههههههههه ولا يهمك

سلطان والاثارة ماخذته : يالله قوم بوريك

سلطان ويعقوب كانوا يتمشون ليما وصو الكافي شوب اللي كانت سمر وسارة وارفيجاتها قاعدين فيه ... سلطان قعد يأشر على مجموعة البنات يبي يبين ليعقوب البنت الحلوة اللي يتكلم عنها بس يعقوب ما يشوف شي من الزحمه

يعقوب وين مااشوف شي
سلطان كاهي يا ولد الناس قاعدة ومبوزة مثلك

يعقوب واهو يدور على البنت اللي يتكلم عنها سلطان لمح سمر يالسة بنفس الكوفي شوب .. يعقوب سرح واهو يطالع سمر وايشوفها حزينة ويسأل حاله اشفيها زعلانه

سلطان واخيرا شفتها
يعقوب ............
سلطان يعقوبو
يعقوب ................

التفت سلطان حق صديقه

سلطان اشفيك انت

انتبه يعقوب حق ارفيجه

يعقوب نعم ؟ ما سمعتك
سلطان انت اشفيك؟؟ من مساعة للحين وانه ااشر على البنت ولا شايفها
يعقوب هاا؟ لا ولا شي بس كنت
سلطان ماعلينا .. شوفها كاهي اللي لابسة قميص بني وشعرها مرفوع

يعقوب بسرعة التفتت للي وصفه سلطان وانصدم
ايا الخسيسين .. ايا الحقيرين .. تتمنظرون في بنت عمي يا عيال الحرام ... انه اوريكم.
سلطان للحين ما شال عينه لكن يعقوب وقف له واهو واصل حده من الحمق وشوي ويرفس سلطان.. سلطان حس بغيابه والتفت له واهو يضحك..

سلطان ها؟ شرابك؟
يعقوب ممكن اسالك سؤال؟
سلطان شنو؟
يعقوب انت تعرف انت قاعد تطالع منو؟
سلطان منو؟ وسلطان يطالع مرة ثانيه للبنت
يعقوب انت قاعد تطالع بنت عمي ................ اللي قريبا ان شالله راح تكون زوجتي

سلطان انصدم والتفت حق يعقوب.. يعقوب بنفسه انصدم من اللي اهو قاله بس ثبت شكله واهو يطالع سلطان باحتقار

سلطان قول والله؟
يعقوب يعني تبيني احلف لك
سلطان هاذي البنية .......خطيبتك؟؟
يعقوب زوجتي المستقبلية ان شاء الله

سلطان تغيرت الوانه .. ما يدري شنو يرد على يعقوب ويعقوب ينتظر كلمة وحدة من ارفيجه عشان يفقد اعصابه ويرفسه

سلطان انزين يا ولد الحلال انت ما قلت لنا وثانيا انا شدراني انها بنت عمك .. حسبالي بنت ثانية
يعقوب يعني حتى لو بنت ثانية عيب تبقق عينك فيها جذي
سلطان انظر من يتكلم؟؟ انت لا يكون نسيت روحك .. ان كنت ناسي اذكرك؟؟ يالله
عاد بو يوسف ؟؟؟ لا تزعل منا احنه ربع وان شالله ما يتكرر الغلط

يعقوب هدا اعصابه وفكر في انه ردة فعله مبالغ فيها

يعقوب لا لا عادي بس مرة ثانية لا تكرر اللي سويته
سلطان باستعباط: شنو اللي سويته؟
يعقوب بقلة صبر: سلطاااااااااان
سلطان واهو يضحك: اوكيه اوكيه ههههههه والله وانك فلفل يا يعقوب يالله انزين خلنا نرد مكاننا.
يعقوب رد انت انه بتمشى شوي وبرد لكم.
سلطان لحالك؟
يعقوب أي لحالي. أي مشكلة؟
سلطان لا لا ماكو مشاكل بس لا تصيف علينا بعد ساعة راح نمشي من هني.
يعقوب اوكي
سلطان اوكي

وافترقوا الرفيجين...
يعقوب كان يدور زاوية خالية من الناس عشان يطلع القهر اللي فيه وتخيل حاله لو ان سمر وياه بهالحزة جان كفخها.. يلس على احد الكراسي بالطابق الثاني بالمجمع ورفع تلفونه عشان يتصل في سارو ويزفها لكن لاا........!!
(ليش ما اتصل في سمر؟) وحاست الفكرة في راسه ليما طلع رقمها ودق عليها ..

طووووووووط طووووووووط

سمر تطالع تلفونها من غير نفس بس يوم شافت الرقم الغريب فرحت وبسرعه شالته
سمر يعقوب: الووووووو
سمر اضحكت على ردة فعلها ويعقوب تفاجأ منها وابتسم
يعقوب: دوم الضحكة يا ربي
سمر: شكرا
يعقوب شلونج شخبارج
سمر الحمد لله ابخير وانت
يعقوب انه ..... زين

سمر حست بضيجه..

سمر مو من قلب تقولها
يعقوب لا سلامتج بس شوي تعبان نفسيا

سمر حزنت شوي عليه وفكرت لا يكون للحين ما انحلت مشكلته بس استصعبت انها تساله

يعقوب خبرج للحين ما انحلت مشكلتي

سمر حمدت ربها ان اهو اللي فتح مو ضوع المشكله مو اهي

سمر والله
يعقوب أي والله
سمر انزين قول لي المشكله يمكن اقدر اساعدك

يعقوب قال في نفسه (ذاك اليوم تبين تشردين من السالفه واللحين...
سمر قرأت افكاره سمروقالت: انه ادري اني ذاك اليوم ما حبيت ادخل حالي بمشكلتك بس انه وايد فكرت بالموضوع من امس للحين .. وقررت.

يعقوب شقررتي
سمر .... قررت اني .. اسمع مشكلتك واشوف اذا اقدر اساعدك ولا لاء

يعقوب شق حلجه بايتسامه وقال في قلبه ( هيااااااااااااااااااااا)
رد صوته حق طبيعته-: للحين انه اقول لج براحتج يا اختي ما ابي اضيق عليج.
سمر بسرعة: من راحتي لا تخاف محد غصبني

يعقوب الدنيا ما سعته من الفرحة والوناسه .. توه كان يبي ينتحر واللحين شنو حصل... والله وان الدنيا عجيبة.
سمر: الوو
يعقوب اللي ما انتبه حق كلامها : هاا ..سوري شوي انه مشغول ويا ربعي ==سمر : اخليك يعني وبعدين ادق عليي

يعقوب تذكر ربعه انه خلاهم ويا هني بس اقتراح سمر عجبه لانه مو ماخذ راحته: يكون احسن ...
سمر: يالله عيل اخليك اللحين
يعقوب ( وقلبه ما يطيعه): بالسلامة
توه بيسد الخط سمع سمر تناديه
سمر: لو سمحت؟
يعقوب: هلا وغلا
سمر استحت وقالت : ما عرفت شنو اسمك
يعقوب جف حلجه ما يدري شنو يقول لها بس بسرعه طلع اسم: سعد
سمر: هلا وغلا سعد عاشت الاسامي.. انه سمر
يعقوب: والنعم ادري
سمر استعجبت ويعقوب عظ لسانه
سمر: نعم؟
يعقوب: اقصد ادري انه اسمي حلو ... بس سمر احلى بوايد
سمر تفكر ( والله وانه رقله): شكرا ما تقصر.. يالله مااطول عليك
يعقوب: بالسلامه
سمر: الله يسلمك

طووووووووووووووووووووووووووووووووووووووووووووووووو
وط

يعقوب ما صدق حاله وقعد مكانه يطالع التلفون الللي بايده.. سمر تكلمت وياي .. مااصدق .. سمر تكلمت وياي .. وما عرفتني .. ياربي .. وفقني ياربي وخلني اكسب قلبها العنيد ....... واهو يفكر بسمر طق تلفونه
يعقوب من دون ما يشوف الرقم شاله علباله سمر: هلا وغلا
سلطان: هلا فيك ..
يعقوب باستعجاب: سليطين؟
سلطان: أي يبا سليطين . .شعبالك عيل نانسي عجرم؟
يعقوب: والله لو تموت ما تصير مثل نانسي عجرم
سلطان: ادري يا روح امك يالله بسرعه رد من وين ما انت
يعقوب: ليش شصاير؟
سلطان: لا ولا شي بس بنروح ديوانيه بيت زيد احسن من هني
يعقوب : برايكم
سلطان : يالله ننظرك
يعقوب: باي
سلطان: بايات

يعقوب رد للكوفي شوب بعد ما قعد وتمنظر بالكوفي شوب إللي كانت سمر يالسه فيه وتكلمه بس ما شاف احد شكلهم ردو البيت...


بطول دربهم لديوانيه زيد .. يعقوب ما كان يفكر الا بسمر وبعدين لين برد البيت ويدق عليها

الى اللقاء في الحلقه القادمه

بصراحه رائعه جداً

ومشكوره واجد

الجزء العاشر
===========

الساعة 2 بالليل .. وسمر للحين ما ياها نوم.. طبعا افكارها مثل ما اهي .. حمد ولد عمها .. وييته بعد سبوع .. شراح يصير .. شلون شكله راح يكون .. شنو راح تكون ردة فعله ... يااااااااااااه ليما ايي حمد الكويت .. سمر راح تفقد اعصابها ..

غمضت عيونها واهي تستعد حق النوم لان الوقت طافها وايد .. واذا بتلفونها يرن.... شافت الرقم الغريب وتذكرت انه قال بيدق عليها بالليل بس اللحين داق ؟؟ الناس ليل

سمر: الو
يعقوب: صباح الخير
سمر: صباح النور
يعقوب: لا يكون صاحية تنتظريني
سمر: لا والله كنت توني برقد وانت دقيت علي

يعقوب حس باحباط وقال في خاطره .. ما تبي تكلمني

يعقوب: بس عيل اخليج ترقدين وترتاحين ومرة ثانيه ادق عليج
سمر استوت في قعدتها: لا لا شنو تدق علي لا خلك ما فيني نوم اللحين خلاص راحت النومة

يعقوب ما صدق عمره :: يحليلها بنت عمي

يعقوب: متاكدة
سمر: الا متاكده
يعقوب: انزين .. شخبارج بعد ..؟؟

وظلوا يسولفون ويا بعض وسمر مو حاسة بالوقت ويعقوب عايش بعالم ثاني .. عالم ما يعيش فيه الا اهو وسمر .. سمر حست بالتعب من كثر الكلام وياه مع ان سوالفه ما تنمل لكن اهي اللي بغت تعرفه شي واحد لا غير .. مشكلته

سمر: الا ما قلت لي يا سعد؟؟
يعقوب: منو؟؟ أي أي .. لبيه
سمر: شنو اهي مشكلتك .. انه من مساعه للحين وانه اهذر عليك بس نسيت سالفتك بالمولية

يعقوب في خاطره يقول :: شياب للي يااااب .. من وين اطلع لج سالفه اللحين .... بس قرر انه يقول لها إلى يصير له وياها من دون ذكر اسماء .. ولانها ما تعرف شي عن يعقوب ما راح تشك

يعقوب: بسمعج قصه وانتي عطيني رايج..
سمر: قول
يعقوب: السالفه وما فيها ان عندي صديق .. وايد وسيم ...واايد غنوج وكل من يحبه ..
سمر: اها
يعقوب: من يوم واهو في سن 19 اغرم ببنت عمه .. وبنت عمه هاذي اصغر منه ب6 سنين .. واهو كان وايد يتهاوش وياها ويتزاعلون وايد تتنقرش فيه ليما تطير مخه من راسه

سمر شكت في السالفة .. هذي القصة مو غريبة عليها .. ولو انها ما تعرف من اللي يقصده .. بس هاذي الحالة تشابه حالة تعرفها.. بس ما حبت انها تقاطعه وايد ..

سمر: كمل
يعقوب: هذا ارفيجي ظل مثل ما اهو مشاعره و أحاسيسه كله تنشد ببنت عمه بس اهو ما يرضى يتنازل لها لانها وايد شيطانه وراكبة رأسها

سمر تقول في بالها :: لا عيل ترخي له الحبل::

سمر: انزين
يعقوب: واللحين مرت عليه 3 سنوات واهو حاير وياها ما يدري شنو الحل
سمر: وبعد.......

يعقوب حس بضيج الايام كلها يرد له بهالحزة .. حتى سمر حست بظيييج كبير لان الشخص كسر خاطرها

يعقوب: الحين بنت عمه صار بنت كبيرة .. وتلبس مثل البنات .. وتتكلم مثل البنات .. حتى تصرفاتها صار مثل تصرفات البنات بعد ما كانت من احلى ما يمكن.
سمر والنوم تارس عينها: وبعد
يعقوب: شاقوللج
سمر: اللحين شنو صار وياها؟

يعقوب سكت شوي وراح صوب الستريو وشغل اغنيه نوال "" شمس وقمر"" وسمر سمعت الاغنيه وراحت ويا الالحان .. يعقوب سمعها تغني ويا الاغنيه

يعقوب: تحبين نوال.
سمر: ومن ما يحبها؟
يعقوب: خوووووش
سمر بتعجب: شخوشه ؟
يعقوب واهو يضحك: ذوقج مثل ذوقي
سمر : ههههههههههه الحمد لله ولا انه ذوقي مستحيل

يعقوب يقول في خاطره:: ادري يا بعد عمري ادري ::

سمر تقطع افكاره: انزين كمل
يعقوب: وين وصلت ........ أي .. الحين اهو يبي يصارحها .. بس غروره ما يسمح له وبعد ........ خوفه
سمر: من شنو؟
يعقوب: منها
سمر: ههههههههههههه
يعقوب: ليش تضحكين؟
سمر: ريال شكبره يخاف من بنت ..
يعقوب: انتي لو تعرفينا جان انتي بعد بتخافين منها
سمر: والله انها المرأة المتوحشة
يعقوب: هههههههههههههههه الا اكثر
سمر: والله وانه ماعطها ويه .. انه مكانه اطرقها بطراق ما تبي غيره

يعقوب كان يضحك من قلب.. لو تدرين يا سمر انها انتي جان ما قلتي اللي قلتيه هههههههههههههههههههههههههههههههههههه

سمر: دومز
يعقوب: هههه شنو
سمر بحيا: ضحكتك .. دوم ان شالله
يعقوب بكل جديه : معاج ...

سمر حست انه طاف الحدود وياها وردته حق السالفة

سمر: انزين ما كملت لي .. شصار اللحين؟
يعقوب: اييييييييه .. للحين يحاول وياها .. بس اهو وايد افكر انه ينساها ويشوف له وحدة غيرها
سمر: بس اهو ما يعرف شنو حقيقة شعورها تجاهه شلون يقرر هالقرار؟
يعقوب: سيماهم على وجوههم
سمر: لا تقول جذي ..... تدري؟
يعقوب: شنو؟
سمر: ممكن اقترح شي وتوصله حق رفيجك؟
يعقوب: ما طلبتي يا طويله العمر
سمر: مشكور ..... خله يقول لها عن شعوره.. ويشوف بنفسه ردة فعلها
يعقوب: اممممممم .. انتي تشوفين جذي
سمر : الا اشوف اكثر بعد .. بس ارفيجك على حلاته مثل ما تقول لازم يطلع فطين .. ويعرف شلون يسحر بنت عمه المتوحشة..
يعقوب: هههههههههههههههه لو يسمعج بس
سمر: هههههههههه أي والله

سمر ثتايبت وحست انها خلاص .. بتموت من التعب ..

سمر: سعد اللحين انه استاذن منك .. عيني من الرقاد سكرت خلاص ..
يعقوب واهو يتثايب: وانه وياج بعد
سمر: يالله عيل .. سو اللي قلته لك وخبرني النتيجه

يعقوب ما صدق.. اهي متوقعه انه ما راح يقطع عنها باتصالاته .... هياااااااا

يعقوب : ما طلبتي شي
سمر: واللحين يالله .. انه متاكده ان باجر وراك دوام .. وانت مشغول كفايه..
يعقوب : ما انشغل عنج يالطيبة
سمر: ما تقصر .. يالله .. تصبح على خير

يعقوب يطالع الجو من الدريشه..
يعقوب: الشمس طلعت ..
سمر : أي والله ههههههههههههه.. يالله احلام سعيده
يعقوب: ولو انها ما بتحقق
سمر: بحكمه الله راح تتحقق .. يالله مع السلامه
يعقوب: في حفظ الباري ورعايته

طووووووووووووووووووووووووووووووووووووووووووووووووط


سد الخط يعقوب وانسدح على ظهره واهو يطالع السقف ... ما كانت بعيونها الا صورة سمر ... اشكثر احبها .... أي والله احبها ... وعمري ما راح احب حد مثل مااحبها .................. والله يعيني ليما اكسب محبتج

الجزء الحادي عشر
===========

مر الاسبوع واليوم الخميس .. سمر كانت باقصى حالاتها من التوتر والخوف .. ما كان يهديها شي غير اتصالات سعد ( يعفوب) اللي كان ينسيها ولو شوي احساسها بالخوف والشك مع انها ما فاتحته بالموضوع الاانها معزمة تطالب رايه

سارة بنت عمها قلت زياراتها لسمر لانها اهي الثانية مشغولة .. اللي تحبه بيرد من السفر باجر وهما متواعدين يتلاقون بعد مدة من ما يوصل البلاد بالسلامة.

حمدان كان عايش بدنيا ثانيه .. حبه لبنت عمه كل يوم يزيد عن سابقه .. مع ان ابوه قرر انه يتقدم لها بصورة رسمية .. حمدان طلب من ابوه ان ينتظر ولد عمه حمد عشان تكبر الفرحة ..اااه يا سارة .. لو تدرين انتي شنو بالنسبه لي ...

وحمدان عايم بافكارة .. دخلو عليه الشباب . ناصر ومشعل وراشد ..

حمدان: الله الله الله .... شمييبكم انتو هني .. الناس تشتغل مو مثلكم.
ناصر: خس بويهك يالزطي .. احمد لاربك يايين ناخذك بدل ما تشيلني وتلمني وتقول لي وحشتني يااخوي مادري عنك انت وين من جم من يوم.
حمدان: ههههههههههههههههههههه اقلب ويهك زين انت محد يدري انت وين تقعد لو احد يدري جان ما ولهت عليك امي جذي.
ناصر: انه وامي كيفنا انت مالك شغل.
مشعل: يالله يااخوي قوم نطلع ما مليت من حكرة المكتب .. أعنهبو دارك ما بتطير الشركة ..
حمدان: وين بتروحون؟
راشد: طالع هذا .. اسكت .. كل دقيقة محسوبة عليك .. ياه ما تقومونه هالسمت.
راشد: أي والله سمت . .يالله قوم يا بو زينه خلنا نروح ورانا اشغال وايد
حمدان: شوفو انه مااطلع ويا مراهقين .. نادوا يعقوب عشان يطلع ويانا
ناصر: أي والله انه ما راح اطلع من دون حبيبي ولد عمي
راشد: هاذا ان قدرتوا تكلمونه ..
مشعل: ليش للحين حابس حاله
راشد: لا .. اخوي المحترم مشغول بوكاله السيارات هالايام وما عنده وقت حق أي شي .. اكله وشربه بالمكتب .. وقعدته بالبيت محسبوه بالدقايق ولا كل حزة قبض لك التلفون وقام يدق يدق رنات وبعدين يختفي لين احد اتصل له.
حمدان: شكله ولد العم محصل له وحده فارغة تسولف وياه
مشعل: الا قول محظوظ مو عيل انه ملاحق هالسحليه من مكان لمكان
ناصر: عيدها وربي ابيك تعيدها .. عشان اشق حلجك

كلهم تيمعوا عليه وبين قزم جدامهم

ناصر: لكن انه اللي اوريكم ويا خشومكم ك واحد قابظ ليطول اعنبو ولا برج التحرير يالله زين انه بروح حق ولد عمي حبيبي
راشد : خذني وياك عن هالشيبه حمدانو
مشعل: وانه وياكم ويالله ياحمدان عندك خمس دقايق
حمدان : انطروني شوي اعنبو بتشرد الطلعه
ناصر: وانت الصاج الا هل الطلعه هههههههههههههه

رشود ونصور اللي ضحكوا ولا مشعل وحمدان مسبهين ما يدرون بالسالفه

دخلوا كلهم على يعقوب من دون ما يعتبرون حق السكرتيرة فتووون اللي راشد بكل جدية معجب فيها كبر راسه بس حمدان جرٌه لداخل مكتب يعقوب الل انصدم من دخلتهم

يعقوب: بسم الله . من وين طالعين انتوا هني شركه مو ديوانيه ام زيدان
ناصور: هههههههههههه حلوة ذي ام زيدان
يعقوب: جب زين ما تقولون لي شمييبكم هني
راشد : اووووووووهوووووووو احمد ربك احنه يايينك هني نبي نطلعك
مشعل: أي والله يا يعقوب ملينا من الشغل واليوم الخميس يعني اللي ما يطلع يخيس
ناصر: انت كل خميسيه ما تطلع يعني كل خميس تخيس
مشعل: جب زين لا ماكو نانسي عجرم السالميه
ناصر: تكفى الا نانسي
راشد: منو نانسي السالميه ذي
ناصر بكل شاعرية واهو ايود على قلبه ويطالع جدامه: هاذي إلى ليما تشوفها تغني غصب : يالابس الثوب المنقط واسمك ياحلو مافيه نقطه
مشعل: هاذي اسمها عاد اللي منقط
راشد وحمدان : ههههههههههههههههه أي والله أي والله
ناصر: يالله عاد يا يعقوب خلنا نحجز لنا ذاك الشاليه اللي ماعليه شاليه ونقضي الليله صباحي
يعقوب: انت يالمراهق الزطي والله محد بيودينا في داهية الا انت
حمدان: يالله عاد يا يعقوب .. والله انك اذية
ناضر: وهاذا انه اللي قايل ما بتحرك من دون ولد عمي حبيبي راعي الجحيله
يعقوب: هههههههههه جحيله بعينك يالله فارجوا وراي شغل
حمدان ومشعل وراشد وتاصر كلهم في حشرة وحده يترجونه يطلع وياهم يعقوب ما تحمل الصوت اكثر وقال بصوت مرتفع.

يعقوب: انزين انزين والله وانكم فوضى وميهب ا تشتغلون بسوق اليمعه انتو

ناصر قبض ولد عمه رشود وقال بصوت واطي :: والله وانها فكرة؟
رشود : اقلب ويهك يا جليل الحيا
حمدان: شهالبسبسة يا غربال الله فينا
ناصر : ها ولا شي .. بس افكر بالديرم
مشعل: شنو
ناصر بهبال: ها ها لا اقصد بنانسي

ووجه كلامه حق يعقوب: يالله ياولد عمي تكفى عن الشطانه واللعانه
يعقوب: يود لساننك لا ااحشه لك حش
ناصر: ان شالله بس انت وافق
يعقوب: انزين بس نرد بنفس اليوم لاتنسون باجر حمد ولد عمي بيرد من السفر ومافينا شده زعل عمي بو حمد علينا
الشباب بنفس الوقت: ولا يهمك

يعقوب ضحك وعدل اغراضه وطلع وياهم.

سمر كانت قاعده بالبيت يوم اتصلت فيها سارة..
سمر هلا هلا بالقاطعة
ساره منو انه ولا انتي
سمر جبي زين يالسباله اوريج يالميهوده
ساره ههههههههههه يالله عاد سمور شخبارج
سمر بخير الحمد لله بس بموت من الفرحة
ساره ويه حتى انه
سمر ما بغينا والله يا بنت عمي
ساره أي والله أي والله اشهد انج ما خبتي يا بنت العم
سمر هههههههههه اشفيج عبلو
ساره ههههههههههههه لا ولا شي بس وايد مستانسه
سمر دومز
ساره اجمعين .. الا اقول لج شرايج نروح نشوف لنا فلم حلو جذي بالسينما
سمر والله فكرة .. بس ان عزمتي الهيالق ربعج انه ماني رايحة.
ساره لا والله بس انه وانتي لانهم ما ينفعون
سمر ليش أي فلم بنروح
ساره يا بعد روحي هريتيك روشن نزل فلمه اليديد
سمر يا بعد قلب بو عيون خضر
ساره أي ولله خلينا نروح ونتحسر شوي ونحفظ لنا جم كلمه
سمر هههههههههههههه اوكيه يالله متى بتمرين علي
ساره بمر عليج الساعه 2 بنتغدى وبندخل الفلم مباشرة..
سمر بتيين ويا السايق ؟؟
ساره لا عندي سيارة يعقوب.
سمر ليش اهو وينه
ساره لا طالع ويا الشباب كلهم
سمر شعندهم
ساره ههههههه عربده يوم الخميس
سمر ههههههههه والله وانتي الصاجه
ساره يالله عيل راني
سمر على خير رينا

وسدوا الخط ...................

الجزء الثاني عشر
================

اليوم حمد بيرد من السفر.. يا الله .. ما اصدق حالي شنو ممكن اسوي .. شنو ممكن اقول ويوفي بحق هذي السنين كلها .. 3 سنين ونص .. ولا كلمته فيها ولا شفته .. مر الوقت بهدوء بالرغم من المشاعر اللي تغلي فيني

يـا قلــبي هــدي من وتــيرك خـــلٍ تــباه بالهـــوا يجي لـــــك
خـفف الدقــات ببطــنوك ولا تلــوع الخفــــوق بمواجيــعك
شروات حبيب القلب ما تلاقي رفرف يا قلبي باسم ولــــــــيفك

الساعة خمس الفير .. وسمر للحين ما اتصلت بيعقوب .. واهو اللي من رد من الشاليه ظل يتصل فيها بس جهازها كان مغلق .. تحير .. ليش مقفول تلفونها؟؟ اهي ما تدري انه راح يتصل فيها ؟؟ شهالاستعباط
وصلت الساعه 6 .. ويعقوب يالس واهو بناره يطالع التلفون بكل غيض ولو على وده يحذفه من البلكون ويكسره واول ما شاله عشان ينفذ اللي في باله .. وصله مسج .. فتح المسج
(.. ظروف عائليه .. ما راح اتصل اليوم .. اشوفك على خير..)
نزل يعقوب اتلفون ونزل وياه راسه بس بعد راح ووقف بالبلكون .. وقعد يطالع السما .. وماكو في باله الا اسم واحد
حـــــــــــــــــــــــــــــــــمـــــــــــد


الساعه 7:30 الصبح وبيت بو حمد فوضى .. ام حمد يالسه توري الفحم عشان تبخر البيت ودار ولدها الغالي .. ووليد قاعد يتزهب عشان يروح ويا ابوه المطار والدنيا مو سايعته ابوه المطار والدنيا مو سايعته اخوه الغالي بيرد من السفر من بعد سنين طويله فرقى وغربة .. شلي يصبرني للساعه 10

توه وليد بينزل تحت الا وتلفونه يرن .. سمر متصله .. ابتسم بمكر وسكره بويهها .. نزل تحت والتلفون يرن .. هم سمر واهو في مزاج رايق انه يعصبها ويلعوزها وسكره مرة ثانيه .. رن مرة ثالثه وتوه بيسكره بس كسرت خاطره سمر اللي اللحين قاعده على نار تبي تعرف اخبار حمد.. قرر يجاوبها

سمر: الو وليدو
وليد: هلا هلا سماري
سمر بعصبيه : كل تبن زين؟
وليد: هههههههههههههههههه ليش عاد؟
سمر: وتسالني ليش .. من مساع وانه ادق عليك وانت تسكره بويهي .. صج قليل ادب
وليد: انه اسف وحقج علي بس قلت بلعوزج شوي
سمر: لا والله هين انه اوريك ان ما شكيتك عند حمد
وليد: ما تقدرين
سمر: ليش بالله؟
وليد: لان لسانج هذا الطويل راح ينقص جدامه مو متعنترة علينا اللحين
سمر بحيا: تهقى جذي يا وليد؟
وليد: الا جذي ونص
سمر واهي تتقلب على فراشها: اااااااااه يا وليد .. متى متى متى ؟؟ والله مليت .. من البارحه وانه ما ياتي نوم وانه انتظر الساعه 9
وليد : ليش بالله .. لايكون في بالج انج اتيين ويانا المطار
سمر: اكيد ما يبيلها سؤال
وليد: كلي تبن وانثبري مكانج محد بيروح الا الرياييل الحريم ينتظرون في بيتنا
سمر: خانت حيلي .. لا صج والله كسرت خاطري يالله زين انه بيي وياكم
وليد : ماكو مكان لج.. انه وابوي وعمومي بنروح بسيارة والشباب بالسيارة الثانيه
سمر: شهالحشرة والهيله .. و حمد وين يقعد؟؟
وليد : حمد بيقعد ويانا بالسيارة.
سمر : لا يا بوك انه بطلع ويا بابو بروحنه وباخذه بسيارتنا وانت تسكت وتنطم بعد
وليد: بنشوف
سمر: لا تتحداني
وليد : يالله يالله بروح اتريق انه والله انج ياهل
سمر: اوريك يا عسعس الديرة
وليد: سكتي يالسحليه
سمر: باي
وليد واهو يضحك: باي

سمر سدت الخط واتصلت في سارة بسرعة
سارة والرقاد تارس صوتها: الووووو
سمر متعجبه: سارو .. انتي راقده؟
سارة بظيج خلق: اوووووف سمور مالي خلقج شتبين؟
سمر: عدال على روحج .. شمرقدج هالحزة ؟؟
سارة: اللي مرقد خلق الله
سمر: يالله زين قومي وتعالي بيتنا بسرعة ابيج بموضوع هام وخطير
سارة واهي تتافاف: اووووووووووف سمر .. والله انج فاضية .. انه فيني رقاد وما ابي اقعد الا الظهر
سمر: عسى خير .. مااتصل فيج شمشوم ؟
سارة: منو؟
سمر : هههههههههه قصدي خالد مااتصل فيج؟
سارة: مو شغلج .. اي اكيد اتصل فيني .. سمور والله توني راقده من ساعه خليني اكمل رقاد وبعدين بتصل فيج
سمر بظيج: سارة انه فيني وايد كلام وماادري اقوله لمنو غيرج؟
سارة: .............
سمر: سارو؟؟
سارة : .................
سمر: شوف اللي ما تستحي على ويهها .. هين يا سارة انه اوريج

سدت سمر الخط بعد ما رقدت سارة عنها واهي متظايجه حيييييل ما تدري تتصل في منو .. وليد ماله خلق .. وسارو راقده .. ونصور للحين ما رد البيت ويا مشعل .. ماكو الا امها .. بس امها اللحين راقده
قلعتج سمور القرده .. من قالج تقعدين من الصبح .. خلج تستخفين جدام هالاربعه جدران.. ورمت حالها على السرير .. واهي تتعفر بين الشراشف .. رن تلفونها وانقطع .. مسد كول .. منو؟؟ شافت الرقم وتهلل ويهها .. يا ويلي شلون نسيته سعد ؟

اتصلت مباشرة بالرقم
يعقوب كان بالحمام يحلق يوم رن تلفونه وطار من الحمام يقبض على التلفون ويقول الو قبل لا يضغط على الحبه الخظرة.. لعن حاله التعبان ورد على التلفون بشوق..

يعقوب: الووووووو
سمر: صباح الخير
يعقوب وقلبه تهلل: وينج يا معوووده
سمر: ههههههههه كاني يا معود
يعقوب واهو متظايج حيل: والله اني ضعت بليا اتصالج وجم مرة اتصلت ولقيت تلفونج مغلق .
سمر: لا بس انه اغلقته لان اليوم يوم خاص جدا جدا جدا
يعقوب واهو متحير ( شالخاص باليوم؟): عسى خير؟
سمر: الخير بويهك .. بس اليوم احد من عايلتنا بيرد من السفر
يعقوب وويهه مكشر: منو؟
سمر واهي تبتسم من خاطر: ولد عمي الغالي.. حمد
يعقوب واهو يخنق الوساده من تحته ويتصنع الغباء: مااذكر انج سولفتي لي عنه..
سمر باستغراب: عجب ؟؟ ما قلت لك عنه؟؟ زين اقول لك عنه ..اذا تبي
يعقوب: سمعينا ..
سمر: ان شالله

وقعدت سمر تتكلم عن حمد ولد عمها ويعقوب مقتهر من جهه ثانيه واهو ساعه يخنق الوساده او يخنق حاله شاللي عاجبج فيه ياالسحليه شاللي عاجبج فيه ؟؟ سؤال محير يعقوب وما عنده جواب عليه..
بعد ما خلصت سمر من الكلام عن حمد بصورة موجزة .. تنهدت عميق .. خلت يعقوب يسالها غصب

يعقوب: بلاج تتنهدين
سمر: من الظيج اللي بداخلي
يعقوب: سلامتج من الظيج
سمر: الله يسلمك
يعقوب: شاللي مظيجج قولي لي يمكن اقدر اساعدج ..
سمر تشجعت من كلام سعد ( يعقوب) وقالت في خاطرها :: ليش ما اقول له وارتاح احسن لي وما اظن انه بيعصب ولا يتنرفز ........ لا لا ما بقول له ولا شي
يعقوب: الو الو سمر؟
سمر : هلا هلا سوري خذتني الافكار شويه ..
يعقوب واهو يخبي ظيجه: حمد لله على السلامه
سمر حست بظيجه : الله يسلمك .. عسى خير .. اشفيك سعد؟
يعقوب واهو يحاول يغير من نبرة صوته الحزينه: لا ولا شي خير ماكو شي بس .. مستعيل شوي
سمر: خير وراك شي؟
يعقوب : اي والله امي تنتظرني اخذها المستشفى
سمر: سلامات ما تشوف شر خالتي
يعقوب انتبه حق كلمه خالتي وابتسم ورد حق تكشيرته: الله يسلمج ويسلم خالتج
سمر: ههههههههههه يالله عيل انه اخليك
يعقوب: بالسلامه
سمر : الله يسلمك . باي
يعقوب من غير نفس: بايات ............... وسكر الخط

سمر تعجبت .. هاذي مو عوايد سعد انه يسكر الخط قبلها .. سعد اليوم زعلان ... بس ما قدرت تعرف شنو فيه؟ حد ضايجه ولا عصبه؟؟ ولا لاني مااتصلت فيه .. زين انه دزيت له مسج .. لا يكون زعل من كلامي عن حمد .. انزين اهو ماله شغل ان تكلمت عن حمد ولا غيره ..اهو اللي طلب مني اني اتكلم عنه .... ياربي والله الرياييل حيرة .. بس تعال .. أنه ليش افكر فيه هالكثر .. اهو صج رفيج طيب وحليو وحبوب .. بس مو لدرجه اني افكر فيه بهالطريقه .. لا لا هاذا من الادب والذوق اني اسال عنه او اتسائل لين تغير موقفه ويا ي ... لا يكون مل مني .. لا مااظن ... أووووووووف الحين انه شفيني .. أقوم اسبح احسن لي من هالاساله البايخه اللي مالها طعم.. يمكن متناجر ويا حبيبته .. اذا عنده حبيبه .. اكيد عنده حبيبه .. شخص حلو المحشر والكلام مثل سعد لازم يكون له حبيبه ولا بعد تموت فيه .. لا لا ما اظنه راعي سوالف .. وانه شدراني فيه .. لا عايشه وياه ولا اعرفه .. بس اذا عنده حبيبه لازم انها حلوة حلوة تناسب ذوقه .. اكيد حلوة.. لا هذي اكيد فيها .. سعد مبين عليه راعي ذوق عالي واكيد حبيبته من الحلوات .. واكيد . اكيد .................... ليما ارقدت واهي تقكر في سعد ........ سمعتوا شقلت .. قلت سعد .. ما لاحظتوا ... اول مرة سمر تفكر في احد غير حمد قبل لا تنام ......................؟؟ فهمتوا شي ............. خلكم قلعتكم ؟؟

الى اللقاء في الحلقه القادمه

تكفين لا تتاخرين علينا باقي الأجزاء
بس صدق بدايتها روعه ودخلت في جوها
تكفين لا تتاخرين

مشكوووووووووووووووره اختيه عالموضووع الله يعطيك الف عافية

خوش قصة كملي ياراويه ويعطيك العافية .