ولــــــــــــــــــــــــد العم ... روايه اكثر من روعه..وربي كلمة روعه قليله بحقها.

مشكورة دلع على هذه القصة الرائعة و المشوقة

بليييييييييييييييييييييز ما تتاخري علينا بباقي الاجزاء

لا تتأخرين عليهم يادلع الله يرضى عليك ترهم في الإنتظار.

يلا دلع وينك . طولت علينا كتيــــــــــــــــــــر

كمليها بليز

الله يرضى على الجميع الساميوون..

انا اذا كملت القصه انزل اكثر من ثلاثة اجزاء .. والمعتاد عليه تنزيل جزء جزء..

لاني كنت اطمح لردوود ما تقل عن ثمانيه ردود.. لان الروايه فعلا تستحق الرد والمتابعه حتى النهايه..

لكن للاسف لا حياة لمن تنادي.. مافيه تشجيع ... بل العكس ركود وخموول وسبات من قبل الاعضاء..

يمكن ما فيه احد يحب الروايات .. والقصص الطويله .. لكن منتدى قطوف فيه اكثر من 12 الف عضو

مو معقوله كل العضاء ما يتابعون اول روايتين في المنتدى..

كنت اطمح اني انزل اكثر من 6 روايات لكن ما فيه تشجيع للاستمرار وللعطاء..

المراقبه قيرل ما قصرت معي طلبت منها تثبيت الروايتين لتشجيعي للاستمرار وتشجيع الاعضاء

على كتابة الروايات لان القسم يخلو من الروايات وبالفعل تم تثبيت الروايتين..

ومزيونه الف شكر للمتابعه ..ومي ايضا الف شكر ..

وصدقني يالساميون انا كتبت اني ماراح انزل اجزاء لان عندي امتحانات فترة اسبوعين لكني نزلت

اكثر من جزء بعد ثلاث ايام.. للمتابعين للروايتين...

وانشاء الله انزل الاجزاء كلها حتى النهايه... وانا عند وعدي

تحياتــــــــــــــــــــــي دلـــــــــــــــــــــع

مزيونه.... مي اليكم بقية الاجزاء

وكونوا على موعد معي كل يوم اربعاء

الجزء السابع عشر
============
مرت الايام بسعادة وحلاة عند كل من سارة وسمر وحمد وحمدان .. حمدان اللي تايه بجمال وحسن بنت عمه اللي ما تعبره بنظرة وسمر بحبها العميق لولد عمها المخفي بالاخوة ,, وحمد بحبيبته الخفية اللي محد يعرفها حتى اهو نفسه .. وسارة مع خالد .. ولا احلى , مو؟

طاف شهر على رده حمد من سفره وبعد سبوعين من ردته داوم في شركه العايله بمنصب مدير العلاقات العامه ومكتبه كان بالطابق اللي تحت مكاتب الرؤوساء الثلاثة بو حمدان وبو يعقوب وبو حمد .. سارة دخلت الجامعه في ثاني سنه لها دراسه وسمر بتكمل اخر سنه ثانويه مع ناصر اخوها اللي السنه مو حاط في باله الدراسه ابدا ابدا.

يعقوب اللي الكل لاحظ تغيره الجذري.. فبعد ماكان يعقوب اللعاب .. والي يدور افرصه عشان ينحاش من الشركه ويروح يعربد ويا اصدقائه تغير وصار يعقوب المسؤول عن الادارة الماليه والمحاسبيه بالشركه واللي ينشد به الظهر عند ابوه .. بس محد كان عالم باللي بقلب يعقوب .. لانه كان ساكت معظم الاوقات وما يتكلم في البيت الا عن الشغل والدوام ولا سوالف غير هالسوالف ماتطري على باله .. حتى اصدقائه تباعد عنهم الا سمر ..مع انه قرر انه ينتهي احلامه وياها بس قلبه ما طاع.. ظلت سمر الحلم اللي يعقوب يتمناه ولا يقدر يخليه .. وكل الاوهام اللي بناها عن انه يتركها ويترك الاحلام وياها تبخرت بالهوا..وظل يتواصل معها عن طريق التلفون باسم سعد وعلاقتهم يوم ورى يوم تزيد وتكبر عن قبل مع ان سمر ما تعطيه الفرصه معظم الاوقات .. بس كفايه انها تكلمه وتسولف وياه عن الوحده اللي عايش فيها .

اول سبوع دوام بالمدرسه انتهى , واليوم الاربعاء .. حزة ردتها من المدرسه ويا السايق خلته يوصلها قبل الشركه عند ابوها تبي تكلمه بموضوع بعيد عن امها عشان ما تضايجها مثل كل مرة وتخليها تهون ولا تقول وتخسر الشي ..
سمر لاول مرة بتروح الشركه .. وتعجبت يوم شافتها .. ضخامه وكشخه ورقي ولا عليه وقامت تتفاخر بهاذا الشي في خاطرها( الله عليج يالسمرة شوفي شركه ابوج والله ويحق لج تغترين ) بس سمر بطبيعتها كانت وايد حبوبه مع انها ما تتخالط ويا الناس بكثرة.
راحت عند الريسبشن ( الاستقبال) تسالهم عن مكتب بو حمدان وقالوا لها انه بالطابق السادس.. توها بتمشي الا وتسالهم مرة ثانيه بس هالمرة بحيا واضح عن مكتب حمد ولد عمها قالو لها انه يقعد بمكاتب الادارات العامة بالطابق الخامس واول ما التفتت عشان تكمل دربها ابتسمت من خاطر على افكارها.. مشت لعند المصعد والكل ياكلها بعيونها وبزيها المدرسي .. لكن اكثر شي كان ملفت للناس اهو جمالها وبرائتها وسحرها الغريب اللي عمرهم ماشافوه وموظف الريسيبشن اكثرهم
الموظف للموظفه الثانيه: الله عليها حوريه هالبنت
الموظفه: تشابه احد بالغرور وكانها يعقوب الذري
الموظه: لا والله الا كلها ضاري .. مثل عيونه
الموظفه: يمكن اهي مو بنتهم
الموظف: لا .. كبرياء الذري ولو انها خجوله شوي ..
ركبت المصعد للطابق الخامس ونزلت والخوف مالي قلبها .. اهي شلي يابها لهني ..بس قدرت على خوفها وراحت للاستقبال ..
سمر: لو سمحت ممكن تقولي وين مكتب حمد الذري
الموظف: من فيني ااول له
سمر: بنت عمه .. سمر الذري
الموظف تغيرت ملامحه فورا : يا هلا ومرحبا شرفتينا انسه سمر
سمر وهي مستعجبه: الله يحيك
الموظف: مكتب الاستاز حمد باول لفه على يمينك عندك السكرتيرة منّا راح تدلك عليه
سمر: شكرا ما قصرت
الموظف : نحن تحت الخدمه انستي ولو
سمر راحت واهي تضحك ( والله وان اسمي له هيبه) لفت مثل ما قال لها والتفتت حق مكتب السكرتيرة منّا .. الله شنو هاذي منّّا اعنبو دارها ولا ملكه جمال حلاة واناقه وكشخه ماعليها كلام حست سمرشوي بالغيرة بس مسرع ما نستها يوم شافت عيون اللي يالسين واهم يطالعونها .. شوي تضايجت بس ما عبرتهم
سمر: انتي منّا
منّا باستخفاف: أيوا انه منّا وانتي يا شطورة؟
سمر بنفس الاستخفاف واهي تقط عليها القنبله: سمر الذري
بسرعه تغيرت ملامح منّا مثل موظف الاستقبال وتداركت الموضوع: يا هلا ومرحبا انسه سمر كيفك وكيف صحتك
سمر توها بترد عليها بنفس اللغه بس قالت في خاطرها تستاهل التحقير: ابخير الحمد لله عايشه وانتي شخبارج شعلومج؟
منّا واهي تحاول تتكلم باللهجه المحليه: تمام اسال عنج علومن طيبه.
سمر : وينه حمد ولد عمي
منّا: الاستاز حمد بمكتبه بدك اناديه تا اجي الك
سمر: ما يحتاي انه بدخل عليه
منّا: على راحتك انستي شرفتينا
سمر: الشرف لج
منّا توها بترد بس فهمت الكلام واسكتت..
سمر ما طقت الباب حتى ودخلت .. حمد كان قاعد يشخط باوراق ويوم سمع الدخله المفاجئة رفع راسها عشان يشوف من الداخل وانصدم.. سمر ماغيرها
حمد: سمر؟؟ هلا والله بنت عمي
سمر: هلا وغلا ولد عمي .. ِشلونك شخبارك؟؟
حمد واهو مستغرب: الحمد لله تمام .. شميبج الشركه؟
سمر باستعلاء: الحلال ويايه اتطمن عليه حرام؟
حمد: ههههههههه لا بس الحلال له مو بس راعي واحد الكل هني يراعي حلالج يالطيبه.
سمر : لا انه مااوثق فيكم واحد منكم يلعب به الشيطان ويبوق الحلال كله ولا احد يدري .. لازم مراقبتكم
حمد : الحمد لله انه مدير العلاقات العامه يعني شغلي ماكو فلوس والا كليتيني
سمر : عيل منو بالماليه
حمد: اكبر عبقري رياضيات .. يعقوب
سمر: وع وع وع وع هاذا راعي الحلال .. لايوبا غيروه انه هاذا ماامنه على فلوس المدرسه شلون الحلال كله
حمد: ياه سمر .. هاذا ولد عمج شلون تقولين هالكلام
سمر: اسكت واللي يرحم والديك هاذا انه مااقرب له شي اصلا والله ماادري ليش مخلينه مسؤول عن الحلال
حمد واهو متضايج من كلام سمر: وانتي يا عنزة الفريج كل ساعه بتفرين لي ويهج الحلال والحلال ما تقولين لي اشمييبج يالسوسه
سمر: ههههههههههههه ياحلو السوسه اونس مو.
حمد : خلصيني وراي شغل وايد
سمر: انه مو يايه لك يايه حق ابوي بس قلت امر اسلم على ديار ليلى
حمد: منو ليلى
سمر: اوووووووووف والله انك كبرت وخرفت
حمد واهو يضحك عليها: الله عليج من الصبح للحين وانه متكدر يوم ييتي فج خاطري عن الكدر
سمرتتنهد من قلب وتقول في خاطرها .. يا ويل حالي انه منك يا ولد العم
سمر: شمكدرك يا بو سليمان
حمد يتنهد: لا ولا شي سلامتج
سمر بحزن: ما بتقول لي
حمد يطالعها من طرف عينه: سوالف رياييل مالج شغل فيها .
سمر: ااااااااه براحتك انزين انه بروح حق ابوي ..اتي ويايي؟
حمد: شنو كشته اروح وياج..اصلا مو كل حزة نروح لهم ويمكن انتي بعد ما يدخلونج..
سمر: ها ها ها انه .. سمر الذري ما يدخلوني .. يالله حمد قوم وياي
حمد واهو يطالع الاوراق: مااقدر سمور لو يايه من قبل جان رحت وياج مشغول يالغاليه
سمر: ااااااااااااه اخليك عيل .. ارعى الحلال
حمدك هههههههههههههههههههههههههههههه
سمر: لا يفوتك يا حمد والله كل واحد من السكرتيريه يطالعني باسخفاف بس اقول له اسمي يقول لي صبحج الله بالخير ياانسه سمر هههههههههههههه والله انه رزة ولا ادري
حمد: هههههههههههههههههه الذري وشتبين بعد
سمر: هههههههههههههه أي والله يالله بخاطرك
حمد: في امان الله

بقية الجزء السابع عشر

طلعت سمر من مكتب حمد بعد ما حفظت كل تفصيل فيه .. ويهه ثيابه شكله حركات يده .. كل شي .. تنهدت من قلب وكملت دربها بعد ما حقرت منّا وراحت صوب المصعد
توه المصعد بيقفل الا ويفتح مرة ثانيه سمر كانت تعدل شعرها بمرايا المصعد وشافت اللي واقف بره المصعد.. يعقوب ما غيره .. اهو ظل واقف مكانه يطالعها من المرايا وقلبه يرتعد من كثر شوقه لها .. صار له اكثر من شهر ما شافها .. حتى سمر اللي غطت مشاعرها بنظرات احتقار خفيفه .. قلبها دق لولد عمها من دون ما تدري السبب .. وحشها .. اشتاقت له ولسوالفه ..بس سرعان ما تجاهلت هذا الشعور والتفتت له
سمر: بتدخل ولا شنو؟
يعقوب: بلى
توه بيدق على زر الطابق السادس وشافه مضوي
يعقوب: وين رايحه
سمر: بشوف ابوي
سكت يعقوب ولا تكلم وشغل حاله بالاوراق اللي حاملهم .. سمر احتر مخها من كثر ما تفكر .. صج انه عديم احساس ما سأل عن اخباري شهر من اخر مرة شفته واهو ولا حاس .. وتذكرت ليله رده حمد والكلام اللي دار بيناتهم وحست بالندم بس قلبها ماطاع بسرعه رفعت راسها مثل ما نزلته ولا اعتبرت حق يعقوب .. اهو إللي ياب حق روحه الكلام مو انه..
تعتقدون يعقوب ليش كان ساكت .. يقرى الاوراق... لا والله .. يعقوب كان ساكت عشان يقدر يسمع افكار سمر ويتصنت على دقات قلبها واهو خايف لا تنسمع صوت دقاته اللي كسرت صدره وناويه عليه بالفضيحه .. ما صدق انه ممكن يقعد معاها بمكان واحد مثل المصعد وما يقدر يكلمها .. صخ يعقوب واهو يتنفس عطرها .. كله دلع شقاوة وشطانه بنات بس مو أي بنت هاذي سمر .. اللي يخاف عليها من النسمه لا تجرحها.. وحشتيني سمر.

وقف المصعد وطلع يعقوب قبل سمر وكل اللي قاله : اشوفج على خير .... ورااااااااااح توها سمر بترد عليه بس ما طلع منها الكلام وطلعت من المصعد لا يسكر عليها مرة ثانيه .. سمر حست باحباط لكن ما تدري شنو سببه .. يعني معقوله بتشتاق لولد عمه هالكثر .. والله حمد مااشتاقت له جذي .. هزت راسها تبعد عنها هالافكار ونفخت عمرها لمكتب الاستعلامات...
نفس الحركه ونفس الاستخفاف حصلته ونفس التقدير اللي لاقته من بعد الاستخفاف دخلت على مكتب ابوها اللي وصله خبر من حمد قبل لا تدخل عليه
بو حمدان: هلا هلا والله بحبيبه قلب ابوها .
سمر دلعها كبير عند ابوها لذا راحت تقعد عند كرسي ابوها: هلا يوبا شلونك حبيبي ان شالله بخير
بو حمدان حس من كلامها انها تبي شي وقال في خاطره .. والله لالعوزج يا بنت نجاتو حياله مثل امج
بوحمدان: تمام حبيبه قلبي تمام .. الا ما تقولين لي اشمييبج هني الشركه
سمر: ولييييييييه كل من رحت له سالني نفس السؤال راعيه حلال واتطمن على حلالي ما يحق لي
بو حمدان: الا ويحق لج واللي يقول خلاف اقطع لسانه
سمر: الله عليك يوبا محد مثلك
(...................) حل السكون بالمكان وابو حمدان شغل نفسه مرة ثانيه بالاوراق اللي جدامه وسمر تمت تتحقرص تبي تقول حق ابوها اللي براسها بس ما تدري شلون.
بو حمدان : شلون المدرسه
سمر: ابخير
بو حمدان . اممممممم تمام
(..........) صمت اخر كسره صوت سمر واهي تنادي ابوها
سمر: يوبا
بو حمدان: عيون ابوج
سمر: بتتاخر وايد بشغلك
بوحمدان: أي حبيبتي ..انه اتصلت في امج وقلت لها اني ما بيي البيت حزة الغدا
سمر بخيبه : اهاااااااااااااا
بوحمدان: ليش في شي صاير
سمر: صاير؟ شنو صاير ما صاير شي
بوحمدان: وانتي بتمين هني تطالعيني وانه اشتغل
سمر: يوبا الحلال الحلال
بوحمدان سكت عنها: على كيفج
سمر تمت تتحقرص في خاطرها.. انه طول الدرب وقاعده اتدرب عشان اقوله ويوم دخلت له ضاع مني الكلام اللحين شنو اقول له والله حاله الله ياخذ ابليسج يا سارو كله انتي اللي تحطيني بهالمواقف... بس سمر تشجعت وفتحت الموضوع جدام ابوها.. واهو ولا معبرها
سمر: يوبا طلبتك طلبه
بو حمدان من دون ما يرفع راسه: لبيه يا بنيتي
سمر: يوبا .... ابي اسوق سيارة
بو حمدان رفع عينه على طول : ليش؟
سمر: شنو يوبا ليش ؟؟ خلاص ناصر وكاهو خلص تدريب .. وعنده سيارة .. انه بعد ابي .. انه بنت وراي مشاوير واحس اني انغص عليك ويا السايق انه ابي اللي يريحك يوبا
بوحمدان: بس خلاص خلج وياي بالسايق انه مرتاج جذي
سمر وشوي تفقد اعصابها: يوبا يالله عاد انه ادر ي انك ساعات تتورط وياي بالسايق بس ماتقول احسك يوبا انت ماقلت انه مثل امك.
بو حمدان يضحك: لا ما قلت
سمر باستعجاب: يوبا قول والله انك ما قلت لي
بو حمدان: يالله عاد والله اخوانج صاجين يوم يقولون انتي ما تنعطين ويه .. مافي سواقه ولا سيارة زين؟
سمر: ليش يوبا زين والله ربعي البنات كلهن عندهن سيارات الا انه
بوحمدان: وانتي من متى عندج ارفيجات؟
سمر بتعجب: هااه؟؟ من زمان بس انتو ما تعرفونهن
بوحمدان: لا صج عزميهن البيت عشان تكون بيناتنا معرفه .
سمر حست خلاص انه ماكو امل : يوباااااااااااااا
بو حمدان بصوت ابوي ينهي الموضوع: سمر .. بس عاد اخوج ريال لا تحطين عقلج بعقول الرياييل لا باجر بتقولين لي تبين تسافرين بره تدرسين؟
سمر فكرت انها تجرب حظها بهاذا الموضوع بس اهي تعرف نتايجه مسبقا: وليش انت ما تفكر انك تخليني ادرس بره؟
بوحمدن: هااااه ؟؟ أنه يايب لي بنت ولا صبي . .أقول سمر .. نزلي للسايق لا اللحين احذفج من الدريشه ولا اسوي فيج السوايا وافتح الموضوع جدام امج واخليها تهذر عليج ليما يطلع مخ من مخج
سمر والحزن لابسها: انزين..انزين لا تعصب .. حشى لو طالبه من عندك القمر جان يبته لي .. لكن من يوم ورايح لا تقول لي سمر ييبي لي شي ولا سمر حبيبتي قعدي وياي خل تنفعك شيبتك نجوت.
بو حمدان: نجوت الشيبه تسواج وتسوى خوانج كلهم يالله بسرعه البيت.
سمر: انزين انزين ... يالله انه بمشي يا ضاري الذري
بوحمدان واهو منزل راسه يطالع اوراقه: صكي الباب من وراج مااحب التيارات الهوائيه
سمر تقول بصوت غير مسموع .. الله والتيارات عاد ..
بوحمدان: شنو قلتي
سمر فزت من مكانها : لالا ولا شي يالله مع السلامه
بو حمدان: في امان الله

بس طلعت سمر من المكتب ابو حمدان رفع راسه واهو يضحك .. يطالع صورتها على المكتب واهي عمرها 12 سنه يا بعد عمري هالبنيه والله بس وايد شيطانه .. انولدتي بين الصيبان وتربيتي مثلهم بعد ..

ردت سمر البيت وما بغت تتغدى .. امها فتحت وياها تحقيق بس يوم سمر قالت لها ان ابوها موصيها تزوره عشان يوريها الشركه حق تقرير المدرسة..
نجاه: حشى والله المدرسه ماصار لها يومين وبدوا يطلبون التقارير
سمر: يمه هاذي المدرسه شتبيني اسوي اقطع هدومي يعني
نجاه : بس عاد كافي .. ياحبج حق الافلام.. ما تبين غدى
سمر :لا ماابي كليت وايد بالفسحه
نجاه: وين ماكله ما تشوفين ويهج كل ما يه له اختفى
سمر: يمه بخاطرج
نجاه: الله وياج

واول ما راحت سمرغرفتها اتصلت في ابوها واتفقت وياه على الموضوع عشان لا تتوهق ويا امها مع انه لعوزها ليما وافق.

فتحت تلفونها وشافت ان فيه فويس مسج من عند سعد اللي كانت حافظه اسمه بالغريب – نظرا لظروف تعارفهم- وشافت انها اغنيه عبدالله الرويشد .. طمني بس وابتسمت من قلب وقالت ... هاذا وانه كل ليله اتكلم وياك .. سمر كانت عندها معزة خاصه حق سعد اللي عمرها ما ملت واهي تكلمه ولا ليله بالليالي حتى انه صار ينافس سارة بالغلا عندها بس سمر خلت سالفه سعد سر بينها وبين نفسها. واهي بدورها دزت له فويس مسج باغنيه عبدالله الرويشد .. مساله وقت وسكرت تلفونها ونامت من التعب.

الف شكر حبيبتي دلع

على هذه الاجزاء الرائعة

و بانتظار الاجزاء القادمة

اختك : مي

الجزء الثامن عشر
============
اليوم اليمعه .. يوم التجمع العائلي لعوايل الذري كلها .. الا زاهيه وزوجها مبارك لانهم كانوا مسافرين لندن سمر اليوم كانت ناويه تصدمهم كلهم باللي راح تلبسه .. جلابيه من عند خالتها ام يعقوب اللي شرتها لها يوم سافرت الامارات قبل مده واهي للحين ما لبستها وقالت بخليها ليما تتيمع كل العوايل .. سارة اكيد تدري عن السالفه واهي بعد بتشارك سمر بحركتها

الكل كان حاظر . .الا يعقوب ( خانت حيلي) ما يصبر يقعد بمكان واحد مع سمر يطالعها واهي ولا تعبره .. على عكس حمدان اللي امبين انه مل من الانتظار وبيكلم ابوه مرة ثانيه عشان سالفه سارة بنت عمه اليوم .

يعقوب كان في بيتهم واهو يتقلب من القهر على فراشه واخر شي زفر زفرة ولا منها....... اوووووووووف انه ليش حاكر روحي .. اليوم اليمعه وام زيد الطباخه بتسوي شوربه لحم على ذوقي وانه هني ميت من اليوع عشان الخايبه سمر والله مااخليها تستانس بالغدى اليوم انغص عليها. قام وغسل ولبس الكندورة اللي امه اشترتها له بنفس السفرة وراح بيت عمه بو حمدان.
( صدفه مووو)

ما تتخيلون الترحيب والاعجاب اللي حصلوه سمر وسارة يوم نزلوا واهم لابسين اللي لابسينه ..كندورة سمر كانت فرا مع عناقيد من الخرز تتدلى وكانت مفتوحه عند الركبه لبست سمر معاها طقم ذهب خفيف وخلت شعرها هبوب بطوله .. ام يعقوب لمعت عيوناه على سمر وقعدت تفكر ليش ما تخطبها حق يعقوب .. حمدان مثل ما تتوقعون ساح على بنت عمه االلي كانت ولا اروع .. كندورة سارة كانت حمرا مخلوط باسود .. مثل العناقيد من الخرز والخيوط المتدليه وكانت لابسه طقم ذهب ابيض وشعرها اللي يوصل لاتافها كان مفلول .. بس سمر غلبتها ليش ان سارة اطول من سمر بوايد وطول سمر مقبول. والكندورة كانت عليها ولا اروع .. ام حمدان تطالع سارة بفخر واهي تفكر فيها .. زوجه ولدي ولا احلى الله يعينج ياام حمد ان عرفتي عن خطوبه حمدان وسارة.. حمدان مافارقتعيونه سمر الي لاول مرة من ردته من السفر حس انها كبرت وصارت بنت مثل باجي البنات .. بس سرا نمالتفت لسارة اللي كانت مثل الاثير بالسحر .. حسها وايد قريبه منه وانه يعرفها على الرغم انهم ما يتكلمون وايد مع بعض تعبا لطبيعه سارة الخجوله ولانها ما تبي تتدخل بحمد عشان سمر..

وصل يعقوب بيت عمه واهو ميت من اليوع ومن الارتباك ..واقف برع عند سيارته الكروزر واهو متردد.. بس بعدين صمم ... والله ان سمر تكلمت له الا يراويها الشغل العدل .. بيحذفها في مسبح بيت عمه ولا عليه من احد .. جب زين والله وانك بتحذفها ( كل الكلام مر في خاطر يعقوب) يعقوب سمى بالرحمن ودخل البيت اول ما دخل يعقوب راحوا له الشباب يحيوونه ويباركوا له على الخروج من العزله واهو يضحك من خاطر وسمر وسارة كانن مشغولات ويا خالاتهن بالسوالف ..

ناصر: هلا والله هلا بولد العم .. اسير البرج
يعقوب: هههههههه هلا فيك
مشعل: وينك يا يعقوب والله انك مصختها صار لنا مده ما شفناك ولا ييت ويانا الحداق ذيج المرة
راشد بحزن: بعد احد يذكر ذيج الطلعه .. مالت عليك مشعل.
يعقوب: اخلي الفراش واروح حق الزفرة .. مينون انت
حمد: تعال تعال عنهم ماعليك منهم ذيلا بايعينها ومخلصين
ناصر: كل تبن زين
حمد يطالع ناصر من فوق لانه اطول منه وناصر حس بالاستخفاف وعدل من موقفه
ناصر: just jurkin just jurkin
حمد: اسمها joking يالفالح
ناصر: وت ايفير سي ويت ايفير
يعقوب والباجين ذابوا من الضحك على نصور ولغته التحفه هاذا وناصر معزم يدرس باميركا بعد الثانويه.
راشد: اشفيك يعقوب لابس دشداشه اماراتيه الكويتي ما يعجبك
يعقوب: والله كيفي الاماراتي اخف من الكويتي وخبرك الدنيا ثلج بره
ناصر: ايو الله انه اليوم قلت بطلع بشورت بس خفت على سارة لا تنغرم فيني وبسيقاني الحلوة
يعقوب: هههههههههههههههه سيقان اشششششششش اسكت لا تعلم احد ترى نجوى فؤاد بترفع عليك دعوى
ناصر: خلها اصلا اهي من زمان متحذفه فيني هههههههههههههه

ودخل الكل الى المجلس اللي يقعد فيه الكل الحريم والرياييل بس باطراف .. أول ما دخل يعقوب لفتت انتباهه بنت عمه سمر واللي عليها .. ما صدق حاله اهي لابسه اماراتي واهو لابس اماراتي.. يا ويل حالي من الصدف ..الخسارة فيج ياسارو يالقلاده كل شي تقلد جان انه وسمر مثل الشي والكل علباله متفقين!! يعل عدوينج اليهد يا سويرة ..
سمر انتبهت ليعقوب وفجت عيونها بوسعهن .. يحليييييييييييييييييييييييييييييله والله وانه اينن بالكندورة... ي
سارة قرأت افكارها: يحليله اخوي اينن بالكندورة
سمر ما ردت لانها تايهه بوسامه ولد عمها
سارة: سمر .. هوووووووووو وينج
سمر: هاا هني
فكرت سمر شوي .. شهالصدف ولا ........
سمر: سارو .. لايكو ن قلتيله ان احنه متفقين على الكندورات واهو قام رز ويهه
سارة: لا والله حشى علي اصلا انه اليوم طلعت بعبايتي ولااحد شافني شنو لابسه وييتج على طول.
سمر واهي محتارة: الله والصدف
سارة واهي تبتسم بكل خبث على بنت عمها: أي والله

على الغدى الاهتمام كان كله عند يعقوب ويا عيال عمه نصور ماخلاه بحاله واهو كل ساعه يقول له ان بعد الغدى بيدندن له بالاغاني الاماراتيه ويساله عن ذوقه بس يعقوب المغني الاماراتي اللي يسمع له اهو حمد سالم العامري بس لان ناصر ما يعرفه خلاه يتحقرص لين ما يحزره.. وسمر كل دقيقه ترفع عيونها على ولد عمه تبوق نظرات عليه ويعقوب ينتبه لها وتنزل عيونها ... ليش لازم يكون تصرفه خايس وياي لكن اهو الخسران مب انه.. يعقوب حس ان بنت عمه غير اليوم وصار عنده امل انهم يتصالحون اليوم مع انه ما كان مقرر جذي اول ما دخل البيت بس قرر انه يفض النزاع بينه وبين سمر..

مشعل حتس بالتوتر بالجو من لبس سمر ويعقوب بس حاول انه يطفي بعض ال " الملاغه " بالجو مثل ما ينعرف مشعل عندنا بالقصه واهو يفتح موضوع عن جد كان له حدين .. خير وشر
مشعل: الا اقول يا يعقوب.. شحال اربيعتك الاماراتيه
يعقوب استغرب بس كانت فرصه وما يبي يضيعها على نفسه من بعد ما شاف سمر اللي انتبهت حق كلام اخوها.. غيره ولا..
يعقوب واهو يبتسم ابتسامه ساحرة: مو شغلك كمل غداك ومااظنه مو ضوع ينفتح على الغدى جدام الحريم
لكن يعقوب يعرف ناصر اللي ما راح يسكت والكل ساكت عنه وسوالفه
ناصر: اهاااااااااااااااااا انه اقول .. لابس دشداشه اماراتيه وكل كلمه والثانيه يتفدى الناس فيها ... اثاريه طالع لي بره الكويت بالمغازل
يعقوب: شو مغازل ما تعرف ترمس
ناصر والغيرة ماخذته: يا ويل حالي انه ترمس .. شنو ترمس بعد؟
(يعقوب يعرف يتكلم اماراتي لانه يسافر وايد هناك وعنده ربع بالامارات)

بو حمدان يقطع الفوضى اللي صايرة : لين رحت الامارات بتعرف
ناصر: عليك نور يوبا انت قلتها متى بنروح الامارات.؟
بو حمدان: انت اشفيك الكل قارصك .. توها المدارس فتحت اعنبو خل عطله الربيع اتيي..
ناصر: انزين يعقوب.. شسمها
يعقوب واهو يطالع سمر من طرف عينه: اسمها احلى اسم بالدنيا ( يفكر في اسمها )
راشد: يالله عاد يا يعقوب ما صارت حاله ذليتنا ذل ..
يعقوب يتسند على الكرسي ويبتسم بشاعريه: اسمها ظبيه
ناصر وراشد بنفس الوقت يودوا على قلوبهم: يا ويل حالي من ظبيه
سمر ردت على ورى .. يحب اماراتيه
بوحمدان: اوص يعقوب علامك صرت ياهل مثلهم
يعقوب: اسف عمي .. ماقدرت اني احبس شعوري .. لازم افضفض لاحد
بوحمدان: هههههههههههههههههههههه
يعقوب ما يعرف وحده اسمها ظبيه بس تذكر ان ظبيه اسم مشهور بالامارات ويافررحته لانه ذكر هاذي السالفه مشعل .. لان ملامح سمر تغيرت 180 درجه .
ناصر : ها مشعلو اثاريك ارفيج يعقوبو وتدري بسوالفه ولا تقول لنا اوريك يالدقس اوريك
مشعل والصدمه لابسته واهو ولا يدري ان سؤال استعباطي بيتحول لموضوع جد: انه والله العظيم ماادري بشي بس جذي سالت.
حمد اللي يدري ان يعقوب يستغل الموقف ويا عيال عمه ضحك لولد عمه على دهائه اللي لا يعلى عليه ويعقوب يغمز له.

سمر اللي الاكل صار _ من دون ما تدري ليش_ مثل الرماد في بطنها عافت الاكل باجي الوقت ونزلت راسها واهي تفكر بحبيبه يعقوب الاماراتيه الوهميه.
... طول هالفترة مختفي عنه اثاريه حاب له وحده من بره الكويت .. خلها اكيد مثله ماعندها اسلوب وغرور على قله الفايده .. الطيور على اشكالها تقع يا يعقوب.. بس محد كان محترق غيرها اهي.

بعد الغدى طلعوا الشباب للملحق الصيفي اللي في بيت بو حمدان الفخم اللي اهو اكبر بيت في بيوت العائله. ويلسوا يدندون الاغاني الاماراتيه اللي ولا وحده ضيطها ناصر وقام يعصب على مشعل وراشد ويقول لهم انتو السبب..السبب واضح لان ناصر توله على الاماراتيه مع ان لا وجود لها _ مساكين المراهقين_.

سمر ما حبت انه تيلس وياهم بنفس المكان اللي فيه يعقوب لان سارة اختفت وحمد راح يسبح في داره ووليد عنده مخيم يعني ماعندها احد تسولف وياه واخوانها مشغولين ويا نصور .. مافي الا يعقوب اللي قاعد يطالعها بين الفترة والثانيه بنظرات لوم واهو يتذكر ليله رده حمد, قامت تتمشى بعزبه بيتهم البسيطه وعيون يعقوب عليها .. استاذن يعقوب من الشباب ويوم ما لقى جواب قام عنهم من دون ما يحس فيه احد وراح عند سيارته يتصل في سمر
دق مرة ومرتين وثلاث ولا احد رد عليه .. يمكن التلفون مو عندها .. الحين انه شاسوي يا ربي .. والله حاله لا تلفونها عندها ولااقدر اروح صوبها .. وقعد يقلب بتلفونه ليما مل وطلع من السيارة ومشى لعند مسبح العايله.. قعد على الكراسي اللي تحت المظله واهو مغمض عيونه .. سمر كانت تتمشى بالحديقه .. تفكر بحمد ووينه مختفي عنها .. بس حست ان افكارها مالها معنى ابدا ..يوم وصلت لهاذي الفكرة لامت نفسها .. ليش ماافكر بحمد .. مو انه احبه .. ظل السؤال عالق براسها ليما وصلت مشيها لعند المسبح .. شافت يعقوب منسدح على احد الكراسي المظلله واهو مغمض عيونه .. فرت روحها راده من المكان اللي ياته بس التفتت له مرة ثانيه شافته وكانه نايم وراحت يلست وراه بس بمسافه بعيده... تطالعه من وراه .. عقوب فتح عيونه وقعد يزفر قام على طوله وشاف سمر قاعده وراه .. سمر انحرجت من دون أي سبب مقتع عندها وقامت بتروح عنه.. بس يعقوب وقفها لانه حس ان هاذا الوقت الزين عشان يتصالح وياها ..

الى الللقاء في الحلقه القادمه