كانت تحبه الحب اللي يقولون عنه حب جنوني (الله يكفينا شره) ، اتحدت العالم و أهلها علشان تتزوجه كلهم رفضوه في البداية بس بعد إصرارها و ترجيها لهم بأن يخلونها تجرب اختيارها الوحيد ، كانت أول مرة تختار شيء في حياتها أو تقرر تسوي شي فاحترموا رغبتها واقتنعوا .
ولأنها كانت تحبه بجنون سوت (علشانه) كل ما تقدر وكل مالا تقدر ، فعلشانه تعلمت تطبخ ، وكانت أول مرة تدخل فيها المطبخ في حياتها ، تعلمت (علشانه) أطباق متعددة من بلدان متعددة ، من البلاد ومن الشام ومن مصر وحتى من الصين ، ولأنه يحب (الشاينيز فوود) ، احترقت ايديها وهي تسويله (بشت زايد) ، وجرحت ايديها وهي تخرم (ال***ا) علشان تسويله (محشي ***ا) ، وفقدت أعصابها وهي تحاول تظبط (المسأعة) بالطريقة المصرية ، كان يقدر تعبها ويحس فيها (الريال حساس يعني!!) ..
كانت كل ليلة تغير شكلها (علشانه بعد) فمرة تكون (إماراتية) بمكياج بسيط وملابس تقليدية ، ومرة (لبنانية) بمكياج لبناني وملابس (غربية) ومرة (هندية) بمكياج هندي وملابس هندية ، ومرة (غجرية) بمكياج غجري وملابس (غجرية) ، (وعليها الشله) كل ليلة بشكل ومكياج وملابس من مختلف دول العالم وكله هذا (علشانه) علشان تكون أحلى وحدة في عينه وعلشان ما يكون نفسه في أي وحدة غيرها ، وكان يقدر ويحس ويشوف بعينه (الريال يشوف يعني!!) ..
كانت (علشانه) أنهت علاقتها بكل صديقاتها (صديقات الطفولة والدراسة والعمل) نست كل صديقاتها (علشانه) ونست كل أهلها (علشانه بعد) كان هو أهلها وكل صديقاتها ، وكان الريال يشعر فيها ويلاحظ (الريال يلاحظ يعني!!) ..
(علشانه) تجاوزت في أمور دينها (بس شويه) فكانت مرات (تخفف حواجبها) علشان يتماشن الحواجب مع المكياج اللبناني ومرات كانت (تثقل حواجبها) علشان المكياج الهندي ، وكانت تغير لون عيونها مع كل مكياج باستخدام العدسات الملونة طبعا ، و (شعرها) المسكين مرة يكون (أسود طويل) مع المكياج الهندي ومرة (أحمر دجراديه) مع المكياج اللبناني وأخيرا قصته (قصةبوي) مثل قصة نوال الكويتية وحاليا (ما تروم له بحيله) لأنه قصير وايد . وكان هو يحس ويتفهم (الريال يتفهم يعني!!)
نست (علشانه) كل هوايتها التي تحبها ، نست (القراءة) ونست (نزار قباني) وقصايده اللي كانت تقرأنهن ليلا ونست (المشي) اليومي المسائي اللي كانت فيه تستنشق الهوا الطبيعي ، نست كل الهوايات اللي تحبها وكانت تمارسها قبل لاتعرفه وكل هذا (علشانه) والريال مثل ما قلنا يحس ويشعر بها (الريال يشعر يعني!!)
و(علشانه) تعلمت تتكلم في مواضيع ما تحبهن ولا تعرف لهن ، تعلمت أسماء الأندية الرياضية وأسماء اللعيبة وكانت تشجع ناديه المفضل (العيناوي) تشجعه غالبا ومغلوبا وكله (علشانه) تعلمت تتكلم في (السياسة) وعرفت أسماء رؤساء الدول وأسباب (حرب الخليج ونتايجها) وتابعت (مجازر شارون) وتابعت (التخاذل العربي) وكل هذا (علشانه) وكان الطيب يحس ويشعر ويقدر (الريال يقدر يعني!!)
ولأنه (الريال) يحس ويشعر ويقدر ويشوف ويلاحظ كل اللي تسويه (علشانه) قرر يريحها شويه ويخفف من الأعباء اللي عليها ولأنها كانت كل مرة تسوي شي (علشانه) قرر هو يسوي لو شي واحد (علشانها) فهو مثل ما قلنا يحس يشوف يلاحظ يقدر ، فقرر ييب لها وحدة ثانية تساعدها في هذا كله يعني وحدة ثانية (عديلة) علشان تساعدها في كل شي و (علشانها) ..
لا يمكنكم مشاهده باقي المشاركة لأنك زائر ...
فإذا كنت مشترك مسبقا معنا فقم بتسجيل دخول بعضويتك
للمتابعة و
إذا لم تكن فيمكنك تسجيل عضوية جديدة
مجانا ً (
من هنا )
مختصرات طريق حواء
العرض العادي
