لي والدٍ قبره بقـى بيـن الأجفـان
بيدّي دفنتـه وسْـط عينـي لحالـه
وشلون أبنسى والدي والحزن حـان
لازلـت أنـا متعلـقٍ فـي حبالـه
دامي سجدت لخالق الإنس والجـان
ماله شريك أقسـم شريـكٍ ولا لـه
فردٍ صمد مالـه شريـكٍ ولا ثـان
هـو واحـدٍ لا ماسجـدت لبدالـه
محيي الرميم منزلٍ غيـث الأمـزان
وموّقـتٍ شهـر رمضـان بهلالـه
هو من جعل بالأرض مسجد وأوطان
مرغت وجهـي بالسجـود برمالـه
جبـار قـدوسٍ رحيـمٍ ورحـمـن
سبحانـه المعبـود جـلاّ جـلالـه
يا الله تلهمنا مـع الصبـر سلـوان
بعض البشر يصرخ ويبكي جهالـه
لي والدٍ لاجيـت ابوصفـه إنسـان
سمحٍ وسيـع بطـان ياطـول بالـه
من يوم ما ودع ترك كل الأحـزان
بصدورنا ... بصدورنـا يـا عيالـه
كن الحزن رجال والصـدر ديـوان
ضيفٍ ثقيل ونستحـي مـن سؤالـه
قلبي قدوعـه والتعاليـل الأشجـان
والشوق جمـره والمحانـي دلالـه
والدمع وشهو الدمع كنـه ولا كـان
مبطي قضى من كثر فوحـة زلالـه
معقول من حزنٍ تصافق هالاسنـان
كن الحـزن بـردٍ ذبحنـي ظلالـه
في ذمتي ماعـاد تقـوى هالابـدان
دام بمرابعـهـا يـنـوخ جمـالـه
جمرٍ لهـب لاوالله الحـزن بركـان
ثار وحرق حتى الحصى في جبالـه
أسمع ولاأسمع كني إنسان سكـران
أثر الحزن طينـه وسكـر وثمالـه
صبري رفيقي مثل ماتقـول اخـوان
لامرنـي شـيٍ قـعـد وارتكـالـه
في محنتي هـذي تنكرنـي وخـان
بالرغم فيه مـن القسـى والبسالـه
مالوم مثله أن حط رجلـه ولابـان
موقف دخل كل الحزن مـن خلالـه
مالوم رجالٍ غـدى وجهـه ألـوان
يمنى رجوله تصطفق فـي شمالـه
لاشفت وجهه تُقسم وتحلـف أيمـان
من عقب أبوه الموت قرب وطالـه
الموت لك مثل الرسالـه وبرهـان
والشعر الابيض لك من الله رسالـه
مُرْسِل رسالة ومُرسَل إلّه وعنـوان
لا جاء القدر لا مـا يـرد استحالـه
الموت يالانسـان والشيـب خـلان
الموت مثل البحْرْ والشيـب جالـه
دام العـزى بمكسـرٍ كـل الاوثـان
طـه شفيـع الخلـق لاجـا مجالـه
وينه ووين الناس مع مـر الازمـان
من مات أعمالـه بقـت راس مالـه
وصحتك والله مـا تقـدر بالأثمـان
كل يسـوق لصحتـه مـن حلالـه
حزني دخيلك مابقـى شـي ماهـان
كل ضحكةٍ شـدت لغيـري رحالـه
لي والدٍ قبره بقـى بيـن الاجفـان
بيدّي دفنتـه وسْـط عينـي لحالـه
فــيــصــل الــلــويــش
لا يمكنكم مشاهده باقي المشاركة لأنك زائر ...
فإذا كنت مشترك مسبقا معنا فقم بتسجيل دخول بعضويتك
للمتابعة و
إذا لم تكن فيمكنك تسجيل عضوية جديدة
مجانا ً (
من هنا )
المواضيع المتشابهه
مختصرات طريق حواء
العرض العادي
